उपनिर्वाचनमा नेकपा एमालेको तर्फबाट तनहुँ क्षेत्र नम्बर १मा उम्मेदवारी दिएका सर्वेन्द्र खनालले आफ्ना विगतका योगदानलाई हेरेर मतदाताले सांसद बनाउने बताएका छन्।
सोमबार तनहुँमा उम्मेदवारी दिएसँगै सञ्चारकर्मीसँग कुराकानी गर्दै आफूलाई सांसदको बनाउनेमा विश्वास भएको बताएका हुन्।
‘आगामी मैले गर्ने विषयमा, विगतलाई पनि हेरेर यसले गर्न सक्छ भनेर आम मतदाताबाट सांसदको रूपमा मलाई जिम्मेवार प्रदान गर्नुहुन्छ भन्ने मलाई विश्वास लागेको छ,’ उनले भने।
स्थानीय-राष्ट्रिय समस्याको सम्बोधन गर्ने र कानुन निर्माण लगायतका कामहरू गर्ने उनले बताएका छन्। पार्टी राजनीतिमार्फत आम नागरिकको मुहारमा हाँसो ल्याउने खालको काम गर्ने पनि उनले बताए।
खनालको प्रस्तावकमा भगवती न्यौपाने र समर्थकमा एकबहादुर राना छन्।
नेपाल प्रहरीका पूर्वमहानिरीक्षक खनाल मंसिर ४ मा भएको निर्वाचनमा काठमाडौं- ६ मा पराजित भएका थिए। उक्त क्षेत्रमा राष्ट्रिय स्वतन्त्र पार्टीका शिशिर खनाल १४ हजार २ सय २१ मत ल्याएर विजयी भएका थिए भने खनालले ८ हजार ९ सय १७ मत ल्याएर पराजित भएका थिए।
