सञ्चार तथा सूचना प्रविधि मन्त्री रेखा शर्माले मिटरब्याजको समस्या समाधान हुने भन्दै पीडितलाई घर फर्कन अनुरोध गरेकी छन्।
काठमाडौंमा विभिन्न जिल्लाबाट आएका अर्को पीडितको समूहलाई सरकार प्रवक्ता समेत रहेकी उनले मंगलबार पत्रकार सम्मेलनमार्फत् घर फर्किन अनुरोध गरेकी हुन्।
उनले मन्त्रिपरिषदका निर्णयहरू सुनाउँदै मिटरब्याजको समस्या समाधान गर्न जाँचबुझ आयोग गठन भएको र त्यसैले सबैको समस्या समाधान गर्ने बताइन्।
‘जहाँसम्म मिटरब्याज पीडितहरू फेरि पनि आउनुभयो भन्ने कुरा छ। के कुरा चित्त बुझेन भन्ने छ। क्याबिनेटले हिजोमात्रै त्यसरी निर्णय गर्यौं, यसको विस्तृत उद्देश्य थाहा नपाएर पनि आउनुभएको हुनसक्छ,’ उनले भनिन्, ‘उहाँहरूसँग छलफल हुनेछ र मैले उहाँहरूसँग तपाईंहरूमार्फत् पनि के आग्रह गर्न चाहन्छु भने यो काठमाडौंमा दु:ख पाएर बस्ने होइन, उहाँहरू आफ्नो ठाउँमा फर्किनुपर्छ। सरकारले तत्काल यो समस्याको समाधान गर्न जाँचबुझ आयोग गठन गरेको छ।’
यो आयोग केही पीडितको मात्रै समस्या समाधान गर्न नबनेको पनि उनले प्रष्ट पारिन्। सबै पीडितको समस्या समाधान हुने र जनकपुरमा यसको कार्यालय राखिएको उनले जानकारी दिइन्।
‘यो आयोग खास-खास मिटरब्याजलाई सम्बोधन गर्न र अरूलाई नगर्न भन्ने आशयको होइन। यसले मिटरब्याजसँग सम्बन्धित सम्पूर्ण समस्याहरू सदाका निम्ति समाधान गर्ने उद्देश्यसहित गठन गरिएको छ,’ उनले भनिन्, ‘यसको मुख्यालय जनकपुरमा राखिएको छ। त्यसकारणले पीडितहरूले सहज ढंगबाट आफ्ना कुराहरू पुर्याउन सकून् भन्ने उद्देश्य पनि हो। र फेरि यो आयोग मिटरब्याजको समस्या छ/छैन भनेर खोज्नका निम्ति होइन। समस्या छ।’
पूर्वन्यायाधीश गौरीबहादुर कार्कीको नेतृत्वमा सरकारले आयोग गठन गरेको हो। यो आयोगमा पूर्वएआइजी उत्तमराज सुवेदी र पूर्वनायब महान्यायाधिवक्ता गणेशबाबु अर्याल सदस्य छन्।
