मधेस प्रदेशका मुख्यमन्त्री सरोजकुमार यादवले नेकपा(एमाले)ले दिएको विश्वासको मत आफूसँग कायमै रहेको बताएका छन्।
मंगलबार प्रदेश सरकारमा नेकपा(एमाले)का तर्फबाट सहभागी भएका मन्त्रीहरूले राजीनामा बुझाएपछि सञ्चारकर्मीहरूसँग कुराकानी गर्दै मुख्यमन्त्री यादवले एमालेको विश्वासको मत आफूसँग कायमै रहेको बताएका हुन्।
उनले केन्द्रको गठबन्धन अनुरूप प्रदेशमा पनि गठबन्धन बनाउनुपर्ने भएकाले एमालेका मन्त्रीहरूलाई आफैंले सहजीकरण गर्न आग्रह गरेको बताए। सञ्चारकर्मीहरूको जिज्ञासाको जवाफ दिँदै मुख्यमन्त्री यादवले जनमत पार्टी सरकारमा आउने कि नआउने भन्ने विषयमा हालसम्म कुनै निर्णय नभएको बताए।
उनले मधेस प्रदेश सरकारमा आगामी दिनमा पनि आफ्नै नेतृत्व हुने र सरकारमा नेपाली कांग्रेस, नेकपा(एकीकृत समाजवादी) र लोसपा समावेश हुने उल्लेख गरे।
उनले भने, ‘केन्द्रको जुन गठबन्धन छ, त्यही अनुसारले प्रदेशमा गठबन्धनको सरकार हुन्छ। त्यो हिसाबले मैले नै भनेकी अब सहजीकरण गरिदिनुस्। अनि राजीनामा गर्नुभयो। जनमत पार्टीको विषयमा केन्द्रले केही निर्णय गरेको छैन। केन्द्रको गठबन्धनमा त जनमत छ नि उहाँहरूले पनि विश्वासको मत दिनुभएको छ प्रधानमन्त्रीलाई। तर उहाँहरू सरकारमा त हुनुहुन्न। त्यो सन्दर्भमा अहिले प्रदेशमा बस्ने/नबस्ने कुनै किसिमको सहमति भएर आएको छैन। एमालेका मन्त्रीहरूले राजीनामा दिए पनि उहाँहरूको विश्वासको मत मसँग रहिरहन्छ। नेपाली काँग्रेस, नेकपा(एकीकृत समाजवादी) र लोसपा पनि सरकारमा आउँछ । पछिसम्म मेरै नेतृत्व रहन्छ।’
एमालेबाट मधेस सरकारमा सहभागी मन्त्रीहरूले राजीनामा बुझाएका छन्। मन्त्रीहरूले मुख्यमन्त्री सरोजकुमार यादवलाई राजीनामा पत्र बुझाएका हुन्। एमाले नेता राजकुमार लेखीले केन्द्रमा राजनीतिक समीकरण फेरिएपछि आफूहरू सरकारबाट बाहिरिनु परेको प्रतिक्रिया दिए।
उनले नयाँ गठबन्धन अनुसार प्रदेश सरकार निर्माण गर्न सहज बनाइदिएको बताए।
उनले भने, ‘हामीले सहज बनाइदिएका हौं। देशको राजनीतिक परिस्थिति बदलिएपछि बदलिएको परिस्थितिमा राजनीतिको मूल्य, मान्यताको पनि अर्थ हुन्छ। एक खालको समीकरण बनिसकेपछि केन्द्रमा, प्रदेशमा, स्वाभाविक रूपमा त्यसको बदलाव आवश्यक भइसकेपछि हामीले सहज बनाइदिएका हौं। राजनीतिक समीकरण बदलिएपछि समग्रतामा यो परिस्थिति निर्माण भएको हो।’
नेता यादवले सरकारलाई दिएको समर्थनबारे पछि छलफल हुने बताए।
