नेकपा एमालेको तर्फबाट बारा क्षेत्र नम्बर २ का प्रतिनिधि सभा सदस्य उम्मेदवार पुरूषोत्तम पौडेलले बारा जिल्लाको क्षेत्र नम्बर २ लाई खोसेर सप्तरी लैजाने षड्यन्त्र गरिएको आरोप लगाएका छन्।
बाराको गढीमाईमा एमालेले आयोजना गरेको क्षेत्रीय कार्यकर्ता भेलालाई सम्बोधन गर्दै उम्मेदवर पौडेलले यस्तो आरोप लगाए।
'उपराष्ट्रपति बन्न सांसद पद चाहिँदैन, जोसुकै नेपाली नागरिक बन्न सक्छ तर यस क्षेत्रबाट जितेका सांसदलाई यो क्षेत्र खाली गराउन उपराष्ट्रपतिमा लडाएर षड्यन्त्र गरियो,अब जसपाले सप्तरी लैजान खोज्दै छ’, उनले भने।
पूर्वमन्त्री समेत रहेका उम्मेदवार पौडेलले लोकतन्त्र आएपछि यस क्षेत्रमा जसपा र अरूले जिते पनि तिनले यहाँका जनताका दु:ख, पीडा बुझ्न नसकेको बताए।
‘यस क्षेत्रमा जसपाले २ पटक जित्यो,अरूले पनि जिते। तिनले के गरे यहाँका जनता दु:ख, पीडामा छन्। जनताले सहारा खोजेर मलाई बोलाएकोले म यहाँ आएको हुँ’, उनले भने।
कार्यक्रमा जसपा, माओवादी केन्द्र र नेपाली कांग्रेस परित्याग गरी ३ दर्जन एमालेमा प्रवेश गरेका थिए।
