बारा, चितवन र तनहुँमा वैशाख १० गते हुने उपनिर्वाचनका लागि चैत २४ गतेदेखि आचारसंहिता लागू हुने भएको छ।
वैशाख १० गते हुने तनहुँ निर्वाचन क्षेत्र नम्बर १, चितवन २ र बारा निर्वाचन क्षेत्र नम्बर २ मा हुने उपनिर्वाचनका लागि चैत २४ गतेदेखि आचारसंहिता लागू हुने निर्वाचन आयोगले जनाएको हो।
न्युज एजेन्सी नेपालसँगको कुराकानीमा निर्वाचन आयुक्त रामप्रसाद भण्डारीले बिहीबार निर्वाचन आयोग र निर्वाचन आचारसंहिता केन्द्रीय अनुगमन समितिको बैठक बसेर चैत २४ गतेदेखि सम्बन्धित सबै पक्षमा लागू हुनेगरी उपनिर्वाचन प्रयोजनार्थ आचारसंहिता लागू हुने बताए।
उनले उपनिर्वाचन हुने बारा, चितवन र तनहुँ जिल्लाभर नै शुक्रबारदेखि आचारसंहिता लागू हुने बताए।
उनले भने, ‘उपनिर्वाचन आगामी वैशाख १० गते हुँदैछ। त्यो निर्वाचनमा हामीले आचारसंहिता लागू गर्नुपर्छ। आचारसंहिता लागू गर्ने प्रयोजनका लागि आज अर्थात् मिति २०७९/१२/२३ गते निर्वाचन आयोगको पनि बैठक बसेको छ। निर्वाचन आचारसंहिता केन्द्रीय अनुगमन समितिको पनि बैठक बसेको छ। चैत २४ गतेदेखि आचारसंहिता लागू गर्नेगरी निर्णय गरेको छ।’
कतिपय आचारसंहिताको विषयवस्तु, संघीय सरकार, प्रदेश सरकार, स्थानीय तहलगायत सबैलाई लागू हुने पनि बताए।
‘यो निर्णय पूर्ण रूपमा कार्यान्वयन गर्ने प्रयोजनका लागि यदि आचारसंहिता उल्लंघन भएमा त्यसलाई कारबाही गर्ने, कारबाहीको विषय बनाउने विषयवस्तु समेतलाई समेट्ने प्रयोजनको लागि केन्द्रीय आचारसंहिता अनुगमन समितिको बैठक बस्यो र यो बैठकले यसका सबै सरोकारवाला पक्षहरू सबैलाई आचारसंहिता लागू हुन्छ, तत् निर्वाचन क्षेत्रमा मात्रै नभई बारा, चितवन र तनहुँ यी तीन वटै जिल्लाभर आचारसंहिता लागू हुन्छ। कतिपय आचारसंहिताको विषयवस्तु, संघीय सरकार, प्रदेश सरकार, स्थानीय तह लगायत सबैलाई लागू हुन्छ। त्यसैले सबैलाई समेटेर आचारसंहिता लागू गर्दै त्यो आचारसंहितालाई कडाइका साथ कार्यान्वयन गर्ने प्रयोजनका लागि हामीले विभिन्न योजना तर्जुमा गरेका छौं।’
उनले आचारसंहिता उल्लंघन भए उल्लंघन कर्तालाई सजायको भागिदार गराउन आयोगले कुनै कसुर बाँकी नराख्ने बताए।
‘कार्यान्वयन गर्ने सन्दर्भमा विभिन्न निकायहरूलाई कडाइका साथ परिपालना गर्न निर्देशन गरेका छौं। विगतका निर्वाचनबाट पनि हामीलाई आचारसंहिता कार्यान्वयन गर्ने अनुभव छ, उपनिर्वाचनमा पनि राम्रोसँग आचारसंहिता कार्यान्वयन गर्छौं’, उनले भने, ‘यदि कसैले उल्लंघन गर्छ भने उल्लंघन कर्ता सजायको भागिदार हुनेछ। कसैबाट पनि आचारसंहिता उल्लंघन हुनेछैन।’
निर्वाचन आयुक्त भण्डारीले निर्वाचन आचारसंहिता कडाइकासाथ कार्यान्वयन गर्न सम्बन्धित पक्षहरूलाई निर्देशन दिइसकेको बताए।
उनले विगतका निर्वाचनको अनुभव रहेकाले उपनिर्वाचनमा राम्रोसँग आचारसंहिता कार्यान्वयन गराउने पक्षमा आयोग रहेको स्पष्ट पारे।
उनले आचारसंहिता उल्लंघनको अपेक्षा आयोगले नराखेको र निर्वाचन आचारसंहिता उल्लंघन भए उल्लंघनकर्ता सजायको भागीदार हुने बताए।
