नेकपा एकीकृत समाजवादीका सांसद राजेन्द्रप्रसाद पाण्डेले सरकार सदनप्रति जिम्मेवार नभएको आरोप लगाएका छन्।
शुक्रबार प्रतिनिधि सभामा बोल्दै पाण्डेले सरकारलाई विश्वासको मत दिएपछि १९ वटा बैठक भएको र ती बैठकमा सांसदहरूले उठाएको विषयमा सरकारले जवाफ नदिएको बताएका हुन्।
‘सांसदहरुलाई नै थाहा भएन कि सरकारले सुनिरहेको छ कि छैन? जुन दिन रोष्ट्रमबाट उत्तर आउँछ त्यो दिनमात्रै सरकारले हाम्रो कुराहरु सुनेको रहेछ भन्ने थाहा हुने भयो,’ उनले भने।
सिंहदरबारमा संसद भवन हुँदा सभामुखका दायावाया कर्मचारी हुने र ती कर्मचारीले नै सांसदले उठाएका विषय नोट गर्ने र सम्बन्धित मन्त्रालयका प्रतिनिधिहरूलाई दिएपछि मन्त्रीले जवाफ दिने गरेको स्मरण समेत गरे।
‘हामी संसदमा जनताका समस्या बोल्छौं तर सरकार मुकदर्शक भएर बस्यो भने आम जनताको बीचमा संसदप्रति कस्तो धारणा बन्ला ?,’ उनले भने।
उनले हरेक दिन एकजना मन्त्रीले आएर संसदमा आफ्नो मन्त्रालयसँग सम्बन्धित विषयको उठेको कुराहरुमा उत्तर दिने खालको परिस्थिती बनाउन सभामुखबाट रूलिङको मागसमेत गरे।
