राष्ट्रिय स्वतन्त्र पार्टी (रास्वपा) का सभापति रवि लामिछानेले सांसद ढाकाकुमार श्रेष्ठमाथि ७२ घन्टाभित्र कारबाही गरिसक्ने बताएका छन्।
आइतबार दिउँसो बारामा आयोजित चुनावी सभामा बोल्दै लामिछानेले पार्टीले श्रेष्ठलाई स्पष्टीकरण सोधेको २ घन्टा बितिसकेको र अब ७० घन्टा बाँकी रहेको बताए।
‘तपाईंहरूलाई म स्पष्ट पार्न चाहन्छु- भष्टाचारका विषयमा हाम्रो भनाइ, हाम्रो गराइ र हाम्रो कुरा सधैं एउटै हो। चाहे जसले गरोस् कुनै सरोकारको विषय हुँदैन,’ उनले भने,‘त्यो अडिओ सार्वजनिक हुनेबित्तिकै पार्टीलाई निर्देशन दिएको छु- ७२ घन्टाभित्र छानबिन गरेर कारबाही अगाडि बढाउनू भनेर। ७२ घन्टाको अल्टिमेटम दिएको छु।’
यो पनि: रास्वपा सांसद ढाकाकुमार श्रेष्ठले दुर्गा प्रसाईंसँग दुई करोड मागेको अडियो सार्वजनिक
यो देशका भष्टाचारका काण्डहरू ७२ वर्षदेखि अल्झिएका भए पनि आफ्नो पार्टीभित्र प्रश्न उठेपछि त्यो प्रश्नको निराकरण हुने उनले बताए।
‘यो ७२ घन्टाभित्र छानबिन नहुन्जेल सांसदको रूपमा वा साधारण सदस्यका रूपमा हामी हाम्रा सांसद डाक्टर ढाकाकुमार श्रेष्ठलाई कहीँ पनि पठाउने छैनौं। कुनै कार्य गर्न दिने छैनौं। र, मैले ७२ घन्टाभित्र स्पष्टीकरण दिन निर्देशन दिएको २ घन्टा भइसक्यो ७० घन्टा बाँकी छ,’ लामिछानेले भने,‘७० घन्टामा सत्यतथ्य सार्वजनिक गरेर कारबाही गर्न सकिनँ भने मलाई यही गढीमाईमा बली दिनुहोला। त्यो अडिओमा भनिएको छ, मेरा वरपरका मान्छेले मागेका रहेछन् भनेर। मेरा वरपरका माग्ने मान्छे को रहेछन् तिनलाई तपाईंको आँगन, सडकमा घिसारेर ल्याउन सकिनछु भने फेरि पनि मलाई तपाईंले भनेको सजाय दिनुहोला। ७० घन्टाभित्र। घडी हेर्नुहोला, कति बज्यो गन्दै गर्नुहोला।’
यो पनि: घडी हेर्दै गर्नुहोला, दोषी ठहरिए सांसद ढाकाकुमार श्रेष्ठलाई अबको ७० घन्टाभित्र कारबाही गर्छौं: रवि लामिछाने
