जनता समाजवादी पार्टी नेपालका अध्यक्ष एवं बारा क्षेत्र नं. २ का प्रतिनिधिसभा सदस्यका उम्मेदवार उपेन्द्र यादवले संघीयता र लोकतन्त्र विरोधी शक्ति सक्रिय भएकोले उपलब्धी रक्षाको लागि आफू लडाइँको मैदानमा उत्रेको बताएका छन्।
चुनाव प्रचार अभियानको क्रममा बाराको महागढीमाईमा आयोजित गठबन्धनको सभालाई सम्बोधन गर्दै अध्यक्ष यादवले भने, ‘ऐतिहासिक जनआन्दोलन, माओवादी जनविद्रोह र मधेस विद्रोहबाट प्राप्त उपलब्धि समाप्त पर्ने खेल भइरहेकोले तिनै उपलब्धि रक्षाको लागि म लडाइँको मैदानमा उभिएको हुँ।’
विभिन्न जनविद्रोहबाट प्राप्त उपलब्धिको रक्षा चुनौतीपूर्ण बनेको भन्दै अध्यक्ष यादवले आमजनता परिवर्तनको पक्षमा मतदान गर्नेमा आफू ढुक्क रहेको बताए।
इतिहासको पिँधमा विसर्जन भइसकेको राजतन्त्रलाई फर्काउन राजावादी र अन्यत्रबाट परिचालित कुतत्वहरूले संघीयता र परिवर्तनकारी शक्तिमाथि प्रहार गरेर अघि बढ्ने दाउमा रहेको दाबी गर्दै अध्यक्ष यादवले गठबन्धन दलको साझा उम्मेदवारलाई मतदान गर्न आम जनतालाई आह्वान गरे।
बारा क्षेत्र नंं २ अन्तर्गत गाउँ-गाउँमा पुग्दा त्यहाँ जनताको अवस्था अत्यन्तै दयनीय, गरिबी, अशिक्षा र बेरोजगारीको भूमरीमा पिल्सिएको बताउँदै अध्यक्ष यादवले बारासहित सिंगो मधेसको विकास र परिवर्तनका लागि आफूले कुनै कसर बाँकी नराख्ने प्रतिबद्धता जाहेर गरेका छन्।
यही अवस्थामा जनताले आर्थिक संकटबाट पार पाउन नसक्ने ठहर गर्दै कृषि क्षेत्रमा आर्थिक सबलीकरणका लागि किसानलाई खेतमा सिँचाइ र मलको उत्पादन र उपलब्धता मुलुकमा यथाशिघ्र सुरू गर्नु पर्नेमा जोड दिए।
