नेकपा (एकीकृत समाजवादी) का अध्यक्ष माधवकुमार नेपालले आफ्नो पार्टी प्रदेश सरकारमा सहभागी हुने बताएका छन्।
मंगलबार पार्टीनिकट प्रगतिशील नेपाल राष्ट्रिय शिक्षक संगठनको प्रथम राष्ट्रिय महाधिवेशनलाई सम्बोधन गर्दै अध्यक्ष नेपालले पार्टी प्रदेश सरकारहरूमा सहभागी हुने बताए।
उनले आफूहरू संघीय सरकारमा सत्तारूढ गठबन्धनमा रहेको भन्दै प्रदेश सरकारमा पनि छिट्टै सहभागी हुने बताए।
उनले संघ र प्रदेश सरकार दुवैमा आफूहरूको भूमिका हुने उल्लेख गरे।
उनले भने, ‘हाम्रा पनि मन्त्रीहरू हुनुहुन्छ। गठबन्धन दलमा हामी पनि सामेल छौं। केन्द्रमा पनि हामी छौं। अब विस्तारै हामी प्रदेश प्रदेशमा पनि सरकारमा सहभागी हुन गइरहेका छौं। त्यस अर्थमा प्रदेशमा पनि र केन्द्रमा पनि हाम्रो भूमिका रहनेछ। पालिकामा जहाँ हाम्रो पार्टी संगठन छ, उहाँहरूको सहयोग लिएर, उहाँहरूसँग समन्वय गरेर काम गर्नुपर्छ। शिक्षक संगठनले पार्टीसँग समन्वय गरेर शक्ति वृद्धि गरेर दबाब सिर्जना गर्ने काममा तपाईंहरू अगाडि बढ्नुहोस्।’
अध्यक्ष नेपालले राज्यले शिक्षा क्षेत्रलाई धेरै महत्व दिनुपर्ने बताए।
उनले शिक्षकहरूको मर्यादा र जीवनस्तर राम्रो बनाउन विशेष लगानी गर्नुपर्ने बताए। उनले कुनै पनि बालबालिकाहरूलाई विद्यालय बाहिर राख्न नहुने बताए। सबैले कम्तीमा कक्षा १२ सम्म पढ्न सक्ने वातावरण बनाउनुपर्ने बताए।
उनले भने, ‘शिक्षालाई अत्यधिक महत्व दिएर यसलाई अगाडि बढाउनका लागि शिक्षकहरूको मर्यादालाई, शिक्षकको जीवनस्तरलाई राम्रो बनाउनका लागि राज्यले विशेष लगानी पनि गर्नुपर्छ। त्यस्तै शिक्षा प्रदान गर्न एक जना बालबालिका पनि विद्यालयभन्दा बाहिर नरहून् भन्ने सोच राखेर सबै बालबालिकालाई न्यूनतम पनि कक्षा १२ सम्म पढ्ने वातावरण हामीले उपलब्ध गराउनु पर्दछ। प्रत्येक युवाहरूलाई हामीले प्राविधिक शिक्षा दिनुपर्छ। र प्राविधिक तालिम दिनुपर्छ। जसले गर्दा सीपयुक्त जनशक्ति उत्पादन हुन सकोस्।’
उनले युवाहरूलाई प्राविधिक शिक्षा र प्राविधिक तालिम दिएर सीपयुक्त जनशक्ति उत्पादन गर्नुपर्ने बताए।
