नेकपा माओवादी केन्द्रले पार्टी संसदीय दलको विधान संशोधन गर्ने तयारी गरेको छ।
त्यसका लागि पाँच सदस्यीय कार्यदलसमेत गठन गरिएको छ।
सिंहदरबारमा मंगलबार बसेको संसदीय दल बैठकले विधान संशोधनका लागि प्रमुख सचेतक हितराज पाण्डेको संयोजकत्वमा प्रतिनिधि सभाका सांसदहरू पूर्ण घर्ती र विमला सुवेदी तथा राष्ट्रिय सभा सदस्यहरू जगप्रसाद शर्मा र गंगा वेलवासे सदस्य रहेको कार्यदल बनाएको हो।
प्रमुख सचेतक पाण्डेले संसदीय दल विधान संशोधन गर्न कार्यदल बनाइएको बताए। कार्यदलले एक महिनाभित्र पार्टी संसदीय दल विधान संशोधन गर्न आवश्यक सुझावसहित प्रतिवेदन दिनेछ। ‘हाम्रो संसदीय दलको विधान अहिलेको परिस्थिति हेरेर परिमार्जन गर्नुपर्ने अवस्था आयो,’ उनले भने।
संक्रमणकालीन न्यायसँग सम्बन्धितलगायत महत्वपूर्ण विधेयक संसदमा प्रक्रियामा गएकोले ती विधेयक अघि बढाउनुपर्ने मागसमेत माओवादीको छ।
