नेपाली कांग्रेसका सभापति शेरबहादुर देउवाले पार्टीले सोचेअनुसार काम गर्न बहुमत चाहिने बताएका छन्।
अर्को चुनावमा कांग्रेसले बहुमत ल्याउन गरी काम गर्न पनि उनले नेता तथा कार्यकर्ताहरू र शुभेच्छुकहरूलाई आग्रह गरेका छन्।
अहिलेको सरकारमा कांग्रेस सहभागी भए पनि सोचेअनुसार काम गर्न नसकिएको देउवाको भनाइ छ।
‘हाम्रो पार्टी पनि अहिले सरकारमा छ। यसअघि धेरै वर्ष सरकारको नेतृत्व हामीले गरेको पनि हो। तर सोचेअनुसार काम गर्न बहुमत चाहिन्छ,’ मंगलबार नेपाल शिक्षक संघको नवौं महाधिवेशनमा बोल्दै देउवाले भने।
उनले गठबन्धन गरेर सरकार बनाउनुपर्ने भएकोले पार्टी सरकारमा गएको पनि बताएका थिए। उनले भविष्यमा कांग्रेसको नेतृत्वमा सरकार बन्ने सम्भावना रहेको बताए।
‘संविधानअनुसार सरकार बनाउन पनि हाम्रो पार्टीले गठबन्धन गरी अघि बढ्नुपर्यो,’ उनले भने, ‘संयुक्त सरकार भएकोले कतिपय अवस्थामा काम गर्न समस्या हुन्छ।’
उनले कांग्रेसलाई अझै बलियो बनाउनुपर्ने बताए। ‘कांग्रेसका ठाउँठाउँमा संगठनमा समस्या छ, त्यो समाधान हुन जरूरी छ,’ उनले भने।
शिक्षकहरूको समस्या समाधानका लागि काम गर्ने प्रतिबद्धता पनि देउवाले जनाएका छन्।
