रास्वपाको केन्द्रीय समिति बैठक ५ घन्टा सर्‍यो

निर्णय पत्रकार सम्मेलन गरेर सार्वजनिक गरिने

सेतोपाटी संवाददाता

काठमाडौं, चैत २९

राष्ट्रिय स्वतन्त्र पार्टी (रास्वपा) ले केन्द्रीय समिति बैठक केही समय पछिका लागि सारेको छ।

बुधबार बिहान ९ बजेका लागि बोलाइएको बैठक बुधबार नै दिउँसो २ बजे बस्ने गरी सारिएको महामन्त्री डा. मुकुल ढकालले बताए।

‘केन्द्रीय सदस्यहरू उपत्यका बाहिर पनि रहेकोले केही समय बैठक सारिएको हो, अरू कुनै कारण छैन,’ उनले भने।

रास्वपाका सभापति रवि लामिछाने र अधिकांश केन्द्रीय सदस्यहरू उपनिर्वाचन प्रचारप्रसारका लागि तनहुँ, चितवन र बारामा भएकोले काठमाडौं आइपुग्न समय लाग्ने भएको हो।

केन्द्रीय समितिको बैठकका निर्णय पत्रकार सम्मेलन गरी सार्वजनिक गरिने महामन्त्री ढकालले बताए।

पार्टीबाट समानुपातिकतर्फ सांसद रहेका ढाकाकुमार श्रेष्ठ र मेडिकल व्यवसायी दुर्गा प्रसाईबीच कुराकानीको अडिओ सार्वजनिक भएपछि रास्वपाले अनुशासन समितिमार्फत् छानबिन गरेको थियो।

श्रेष्ठलाई सांसद र पार्टीका जिम्मेवारीबाट निलम्बन गरेर रास्वपाले छानबिन गरिरहेको छ।

श्रेष्ठसँग रास्वपाको अनुशासन समितिले अडिओ प्रकरणबारे मंगलबार बयानसमेत लिइसकेको छ।

मेडिकल व्यवसायी प्रसाईसँग २ करोड रुपैयाँ मागेको अडिओ आफ्नो नभएको दाबी बयानका क्रममा श्रेष्ठले गरेका छन्। उनले अडिओ एडिट गरिएको दाबीसमेत गरेका थिए।

श्रेष्ठसँग सोधपुछ गरेर अनुशासन समिति प्रमुख भरतमणि देवकोटाले प्रतिवेदन पार्टीमा बुझाइसकेका छन्। उक्त प्रतिवेदन सभापति लामिछानेलाई बुझाइएको छ। अनुशासन समितिले बुझाएको प्रतिवेदन केन्द्रीय समिति बैठकमा पेश गरी आवश्यक छलफल र निर्णय लिने तयारीमा रास्वपा छ।

२ करोड मागेको अडिओ श्रेष्ठकै रहेको पुष्टि भएमा रास्वपाले सांसद र पार्टीको साधारण सदस्यबाट उनलाई हटाउने सम्भावना छ।

यो पनि:

घडी हेर्दै गर्नुहोला, दोषी ठहरिए सांसद ढाकाकुमार श्रेष्ठलाई अबको ७० घन्टाभित्र कारबाही गर्छौं: रवि लामिछाने

रास्वपा अनुशासन कमिटीले लियो सांसद ढाकाराम श्रेष्ठसँग अडिओ प्रकरणबारे बयान

रास्वपा सांसद ढाकाकुमारको अर्को अडिओ टेप पनि सार्वजनिक

चुनावको मुखमा अडिओ रेकर्ड सार्वजनिक गरिनु शंकास्पदः रवि लामिछाने (भिडिओ)

रास्वपाका प्रमुख सचेतकले संसदमा मागे माफी (भिडिओ)

रास्वपा सांसदले २ करोड मागेको विषयमा छानबिन हुन्छ: गृहमन्त्री

रास्वपा सांसद ढाकाकुमार श्रेष्ठले दुर्गा प्रसाईंसँग दुई करोड मागेको अडियो सार्वजनिक

प्रकाशित मिति: बुधबार, चैत २९, २०७९ ०८:२०

सिफारिस