नेकपा एमालेका महासचिव शंकर पोखरेलले संविधानमा हस्ताक्षर नै नगर्ने पार्टीहरूसँग सहकार्य गर्ने दलहरूले एमालेले संविधान नै मानेन भन्नु लज्जाको विषय भएको बताएका छन्।
बुधबार पार्टी केन्द्रीय कार्यालय च्यासलमा आयोजित पार्टी प्रवेश कार्यक्रमलाई सम्बोधन गर्दै उनले यस्तो बताएका हुन्।
उनले संविधान नमान्ने पार्टीहरूसँग सहकार्य गर्ने दलहरूले एमालेले संविधान नै मानेन भन्दै आरोप लगाउनुको कुनै अर्थ नरहेको जिकिर गरे।
महासचिव पोखरेलले सिंगो आन्दोलनलाई संविधानवादको जञ्जालभित्र राखेर व्याख्या गर्ने कामको कोसिस भइरहेको बताए।
उनले घोषित रूपमा संविधान नै नमान्ने पार्टीहरूसँगको सहकार्यले संसदीय मूल्य, मान्यतामाथि प्रहार गरिरहेको बताए।
महासचिव पोखरेलले जनताको जनादेश खण्डित भएपछि फेरि जनतामा जानुपर्छ भन्ने लोकतन्त्रको विशेषता रहे पनि त्यसमाथि नै प्रहार भएको आरोप लगाए।
उनले नेकपा एमालेले संविधान नै मान्दैन भनेर आरोप लगाउनु जति मजाकको विषय अरू हुनै नसक्ने बताए।
उनले भने, ‘यस्तो मान्यता स्थापना गर्ने कोसिस गरियो कि नेकपा एमालेले संविधान नै मानेन भन्ने अर्थमा संविधान नमान्नु भनेको प्रतिक्रान्ति हो भन्ने अर्थमा व्याख्या गर्ने कोसिस भयो र क्रान्तिकारीका लागि संविधान भनेको नै अघि बढ्नका लागि सह्य हुन्छ भन्ने मान्ने हो, सैह्य हुँदैन भन्ने बदल्ने हो। संविधान कुनै लकिरका फकिर होइन, त्यो बदल्न नमिल्ने चिज पनि होइन। सिंगो आन्दोलनलाई संविधानवाद्को जञ्जालभित्र राखेर व्याख्या गर्ने कामको कोसिस भएको छ।’
उनले अगाडि भने, ‘अहिले पनि नेताहरू त्यही व्याख्या गरिरहेका छन्। नेकपा एमालेले संविधान मानेन भन्ने अर्थमा व्याख्या गरिरहनुभएको छ। संविधान नमान्ने थुप्रै पार्टीहरूसँग त उहाँहरू सहकार्य गरिरहनुभएको छ। जसले घोषित रूपमा संविधान नै मान्दैन, उनीहरूसँग सहकार्य गर्ने, संसदीय मूल्य, मान्यताभित्र अभ्यासमा रहेको चिजलाई अभ्यास गर्ने सन्दर्भमा प्रहार गर्ने। जनताको जनादेश खण्डित भएपछि फेरि जनतामा जानुपर्छ भन्ने लोकतन्त्रको विशेषता हो। त्यो विशेषतामाथि प्रहार गर्ने, संविधानमा हस्ताक्षर नगरेका दलहरूसँग सहकार्य गर्ने। हामीमाथि के आरोप लगाउनेभन्दा यिनले त संविधान मान्दैनन् भनेर आरोप लगाउने। योभन्दा अर्को मजाकको विषय के हुनसक्छ?’
महासचिव पोखरेलले नेपालको राजनीतिमा मुख्य दलहरू भनेको नेकपा एमाले र नेपाली कांग्रेसमात्रै रहेको दाबी गरे।
नेकपा एमाले सम्पूर्ण वामपन्थी शक्ति भनेकै नेकपा एमाले रहेको बताए।
उनले सत्तारूढ दलहरूले आफ्नो चाहनाका लागिमात्रै अदालतको प्रयोग गर्ने गरेको आरोप लगाए। उनले राजनीतिक अस्थिरताका कारण नै नेपाल बन्न नसकेको बताए।
