नेपाली कांग्रेसका महामन्त्री गगनकुमार थापाले बालबालिकाहरूलाई पहिलोको पछाडि दौडाउनु नहुने बताएका छन्।
बुधबार ललितपुरको शान्ति विद्यालयमा आयोजित कार्यक्रमलाई सम्बोधन गर्दै उनले बालबालिकाहरूलाई पहिलोको पछाडि दौडाएर चिन्ता थुपार्नु नहुने बताएका हुन्।
उनले बालबालिकालाई सानै कक्षामा पहिलो हुनुपर्छ भनेर दबाब दिई चिन्ता पैदा गर्दा बालबालिकाहरूको मनस्थितिमा नकारात्मक प्रभाव पार्ने बताए।
उनले बालबालिकाहरूलाई जीवन रमाइलो छ र जीवनमा अझै धेरैकुरा सिक्न बाँकी छ भन्ने कुराका सिकाउन जरूरी रहेको बताए।
महामन्त्री थापाले भने, ‘मलाई त तनाव छ छ, यसो बच्चाहरूलाई हेर्छु, मेरो ६ कक्षामा, ४ कक्षामा पढ्ने बच्चालाई तनाव छ, होमवर्क नसकेको तनाव कहिले के तनाव ? अब त्यो ४ कक्षाको बच्चालाई त जीवन भनेको रमाइलो हुन्छ, लाइफमा यो भन्दा पछि नयाँ कुरा सिक्नुपर्छ भन्ने हुन्छ। दौडिने कुरा सिकाउनुपर्छ तर दौडिँदै गर्दा लड्यो भने थचक्क बस्नु हुँदैन, फेरि उठ्नुपर्छ भनेर सिकाउनु पर्छ। सधैं दौडेर फर्स्ट हुनुपर्छ भनेर सिकाउनु भएन। पहिलोको पछाडि दौडिन सिकाउनु हुँदैन। कहिलेकाहीँ सेकेण्ड भएँ भनेर पनि चिन्ता हुन्छ, पहिलो हुन नसिकाउने भन्ने होइन तर त्यसकै पछि दौडाउनु हुँदैन। पहिलोको आशक्त बनाउनु भएन। काम गर्ने हो, नतिजा नियन्त्रणमा छैन भन्ने हो।’
महामन्त्री थापाले विद्यार्थीहरूले आफ्नो सकेको अध्ययन गर्नमा ध्यान दिनुपर्ने पनि बताए।
