मेडिकल व्यवसायी दुर्गा प्रसाईंसँग मन्त्री बन्नका लागि दुई करोड रुपैयाँ मागेको अडिओ सार्वजनिक भएका सांसद ढाकाकुमार श्रेष्ठबारे निर्णय गर्न बस्ने भनिएको रास्वपा केन्द्रीय समितिको बैठक अझै बस्न सकेको छैन।
बुधबार दिउँसो २ बजे बस्ने भनिएको बैठक सभापति रवि लामिछाने चितवनबाट आउन ढिला भएपछि निर्धारित समयमा बस्न नसकेको हो।
चितवनबाट आइपुगेका लामिछानेले अहिले सांसद श्रेष्ठसँग छलफल गरिरहेको एक केन्द्रीय सदस्यले जानकारी दिए।
‘अब केहीबेरमा बैठक बस्छ,’ उनले भने।
यसअघि केन्द्रीय समिति बैठक बिहान ९ बजे बस्ने भनिएको थियो।
रास्वपा सभापति लामिछानेले आइतबार साँझ बारा-२ को चुनावी सभामा भाषण गर्दै दोषी प्रमाणित भए श्रेष्ठलाई ७० घन्टाभित्र कारबाही गर्ने बताएका थिए।
