नेपाली कांग्रेसको संस्थापनइतर समूहले सरकारमा पठाउने मन्त्रीबारे छलफल सुरू गरेको छ।
नेता शेखर कोइरालाको बालुवाटारस्थित सचिवालयमा आज बिहान बैठक बसेको छ। उक्त बैठकमा सरकारमा आफ्नो समूहबाट पठाउने मन्त्रीबारे छलफल भइरहेको एक नेताले जानकारी दिए।
१४ औं महाधिवेशनमा कोइराला पक्षबाट निर्वाचित पदाधिकारीहरू लगायत केही नेता र सांसदहरू बैठकमा सहभागी छन्। बैठकमा महामन्त्री गगन थापा पनि छन्।
कोइराला-थापा पक्षले कम्तीमा ३ मन्त्री आफूहरूले छान्न पाउनुपर्ने अडान राखेका थिए। कांग्रेसले ८ मन्त्रालय पाएकोमा यसअघि ४ मन्त्री मात्रै सरकारमा पठाएको थियो।
कांग्रेसले यसअघि पूर्णबहादुर खड्का, प्रकाशशरण महत, सीता गुरूङ र रमेश रिजाललाई मन्त्री बनाएको थियो।
कोइराला-थापा पक्षले मन्त्री छानेर सभापति शेरबहादुर देउवालाई दिएमा देउवाले नाम प्रधानमन्त्री पुष्पकमल दाहाल प्रचण्डलाई दिनेछन्। सभापति देउवा पक्षले भने एनपी साउद र मोहनबहादुर बस्नेतलाई मन्त्री बनाउने यसअघि नै सहमति गरेका थिए।
कोइराला-थापा पक्षले भने नाम दिन ढिलाइ गरिरहेका छन्। सभापति देउवा पक्षले ३ मन्त्रीको नाम पठाउन भनेपछि कोइराला र थापा पक्ष छलफलमा जुटेका हुन्। कांग्रेसले प्रधानमन्त्री प्रचण्डसँग ९ मन्त्रालय माग गरिरहेको छ। सत्ता गठबन्धनभित्र कांग्रेसलाई ८ मन्त्रालय दिने सहमति बनेको थियो।
कांग्रेस, जसपा र जनमतले मन्त्री नपठाउँदा अझै ६ मन्त्रालय प्रधानमन्त्री दाहालले हेर्दै आएका छन्।
