प्रमुख प्रतिपक्षी एवम् नेकपा एमालेका अध्यक्ष केपी शर्मा ओलीले प्रधानमन्त्री शेरबहादुर देउवाको भोलिदेखि हुने भारत भ्रमणबारे जानकारी माग गरेका छन्।
मंगलबार संसदमा बोल्दै ओलीले भने,‘भोलि प्रधानमन्त्री भारत जादै हुनुहुन्छ। यो अवस्थामा किन जादै हुनुहुन्छ के गर्दै हुनुहुन्छ। यसबारे जानकारी गराउनपर्थ्यो तर जानकारी गराइएन। यो जिम्मेवारी बोधको अभाव हो। मलाई नरमाइलो र बेठीक लागेको छ,’ ओलीले भने।
उनले प्रधानमन्त्री भारत जाने एजेन्डाबारे केही जानकारी नगराएको भन्दै आपत्ती जनाएका छन्,‘भारत जाने एजेन्डा के के हुन् भनिएको छैन। प्रधानमन्त्रीको भ्रमण प्रतिपक्षलाई जानकारी नगराउने भन्ने हुँदैन। प्रमुख प्रतिपक्षको पनि संवैधानिक हैसियत छ।’
प्रधानमन्त्रीले संसदलाई जानकारी नगरी विदेश जान खोजेको भए यति धेरै मन्त्री हुँदा पनि मन्त्री बस्ने कुर्सी किन सधै खाली हुन्छन् भनि उनले प्रश्न गरेका छन्।
उनले भने, ‘प्रधानमन्त्रीलाई म केही सुझाव दिन चाहन्छु। बाढी पहिरोले अहिलेसम्म १४९ को मृत्यु भएको छ। दसौं हजार बेघरबार छन्। जमिन डुबानमा परेको छ। जनता डुबानमा छन डुबानबारे प्रधानमन्त्रीले कसरी कुरा राख्दै हुनुहुन्छ?,’
सीमा क्षेत्रमा बाँध बनाएर डुबान भएको भन्दै उनले भारतले एकतर्फी रूपमा बाँध बनाएको आरोप लगाए। यसबारे भारतसँग गम्भीर कुरा हुनुपर्ने उनको माग छ।
