राप्रपा अध्यक्ष कमल थापाले पशुपतिशम्शेर राणामाथि षडयन्त्रपूर्ण ढंगबाट पार्टी विभाजन गरेको आरोप लगाएका छन्। साउन २२ गते, निर्वाचन आयोगमा पार्टी विभाजनको निवेदन दिएको दिन बिहान पार्टी विभाजन नगर्ने सहमति गरी आफूलाई 'एम्बुस'मा पारेको र धोका दिएको उनले खुलासा गरेको छन्।
सेतपाटीसँगको विशेष अन्तर्वार्तामा अध्यक्ष थापाले साउन २२ गते बिहान नेता लोकेन्द्र बहादुर चन्दको घरमा चन्दकै उपस्थितिमा राणाले आफूसँग यस्तो सम्झौता गरेको खुलासा गरेका हुन्।
अन्तर्वार्ताका क्रममा उनले भने, ‘साउन २२ गते बिहान साढे ९ बजे, पूर्वप्रधानमन्त्री लोकेन्द्रबहादुर चन्दजीको निवासमा हामी तीन जना बसेर पार्टी विभाजन नगर्ने सहमति गरेका थियौं।’
तर राणाले आफूलाई अल्मल्याउन मात्रै यस्तो सहमति गरेको र आफूलाई झुक्याएको आरोप उनले लगाएका छन्।
‘मलाई अल्मल्याउन मात्रै त्यो सहमति गर्नुभएको रहेछ,’ उनले भने, ‘पार्टी विभाजनको तयारी त उहाँले पहिल्यै गरिसक्नु भएको रहेछ। हामी बिहान साढे दशबजे तिर छुटेका थियौं, दिउँसो तीन चारबजे त उहाँ आयोग गइहाल्नुभयो।’
थापासँगको विशेष अन्तर्वार्ता केही बेरमा सेतोपाटीमा प्रकाशित हुँदैछ।
