गृहमन्त्री जनार्दन शर्माले बाढी र डुबान पीडितको राहत, उद्धार र पुनर्वासको उचित व्यवस्थापनमा कमी हुन नदिने प्रतिबद्धता व्यक्त गरेका छन् ।
गृहमन्त्री शर्माले पीडितलाई राहत, उद्धार र पुनर्वासको व्यवस्था गर्न सरकार अहोरात्र खटिरहेको पनि स्पष्ट पारे ।
व्यवस्थापिका संसदको सामाजिक न्याय तथा मानव अधिकार समितिको शुक्रबारको बैठकमा बोल्दै उनले बाढी, पहिरो र डुबान पीडितको उचित व्यवस्थापन गर्न सरकारले आफ्नो क्षमता अनुसार सक्दो प्रयास गरिरहेको पनि जानकारी दिए । गृहमन्त्री शर्माले पीडितको राहत, उद्धार र पुनर्वासका लागि सरकारले सबै साधन र स्रोतलाई परिचालन गरेको पनि स्मरण गराए ।
उनले बाढी र डुबान पीडितको उचित व्यवस्थापन गर्न सरकारले व्यापक सुरक्षाकर्मी परिचालन गरेको पनि उल्लेख गरे । मन्त्री शर्माले ठूलो प्राकृतिक विपत्ति आइपरेकाले त्यसलाई समयमै व्यवस्थापन गर्न राज्यको स्रोत र साधनले धान्न नसकेको पनि स्पष्टिकरण दिए ।
गृहमन्त्री शर्माले विपद् व्यवस्थापन गर्न सरकार जिम्मेवार रहेको पनि बताए । उनले सरकार विपद् व्यवस्थापनका लागि दीर्घकालीन योजना बनाउन लागिपरेको जानकारी पनि दिए । बाढी, पहिरो र डुबान पीडितलाई राहत उपलब्ध गराउन नसकेको भन्दै सरकारको सर्वत्र आलोचना भइरहेको छ ।
