प्रमुख प्रतिपक्ष दल नेकपा एमालेले प्रधानमन्त्री शेरबहादुर देउवाको भारत भ्रमण पूर्णतः असफल भएको दाबी गरेको छ ।
नेकपा एमालेका सचिव प्रदीप ज्ञवालीले तराईको डुबान समस्या समाधान गर्ने दीर्घकालीन योजनासमेत बनाउने काम नभएको उल्लेख गर्दै प्रधानमन्त्री देउवाको भारत भ्रमण पूर्णतः असफल भएको प्रतिक्रिया दिएका हुन् ।
आइतबार पार्टी केन्द्रीय कार्यालय धुम्बाराहीमा आयोजित एक कार्यक्रममा उनले राजनीतिक दलहरूले डुबान समस्या समाधान हुनेगरी द्विपक्षीय छलफल गर्न राजनीतिक दलहरूले दिएको सुझावलाई समेत प्रधानमन्त्री देउवाले भारत भ्रमणका क्रममा बेवास्ता गरेको आरोप लगाए ।
सचिव ज्ञवालीले भारतसँग नेपालको बढ्दो व्यापार घाटा कम गर्ने, विगतमा भएका सहमति अनुसार अघि बढाइएका परियोजनाको काम सम्पन्न गर्न जस्ता जल्दाबल्दा समस्या भारतीय प्रधानमन्त्री नरेन्द्र मोदीसँग उचाइका साथ राख्न नसकेको पनि उल्लेख गरे। भारतीय प्रधानमन्त्रीसँग नेपालको प्रधानमन्त्रीको रूपमा नभई काँग्रेस सभापतिको रूपमा देउवा प्रस्तुत भएको सचिव ज्ञवालीको बुझाइ छ ।
सचिव ज्ञवालीले प्रधानमन्त्री देउवा आफैँ विवादमा तानिएका दाबी गरे । संविधान संशोधन जस्तो आन्तरिक मामिलालाई द्विपक्षीय छलफलको विषय बनाएर प्रधानमन्त्री आफैँ विवादमा तानिएका प्रष्टिकरण दिएका हुन् । सचिव ज्ञवालीले प्रधानमन्त्री देउवाले संविधान संशोधनको विषयलाई भारतमा उठाएर संसदको मानहानी गरेको आरोप पनि लगाए । उनले प्रधानमन्त्री देउवाको संविधानप्रतिको निष्ठामा प्रश्न उठेको दाबी गरे ।
एमालेले ४ दिनभित्र प्रदेश नम्बर २ को स्थानीय तह निर्वाचनका लागि उम्मेदवार तय गरिसक्ने पनि जनाएको छ । सचिव ज्ञवालीले प्रदेश नम्बर २ को स्थानीय तह निर्वाचनका लागि ९० प्रतिशत उम्मेदवार चयनको काम सकिएको र बाँकी काम पनि आगामी १५ गते भित्र गरिसक्ने स्पष्ट पारे । एमालेले प्रदेश नम्बर २ को निर्वाचनमा पनि आफ्नो पार्टी पहिलो शक्ति बन्ने दाबी गर्दै आएको छ । उनले एमाले पहिलो शक्ति बन्ने देखेरै काँग्रेसलगायतका दलहरूले एमाले विरोधी गठबन्धन बनाइरहेको तर्क गरे ।
सचिव ज्ञवालीले स्थानीय तह तेस्रो चरणको निर्वाचनमा आफ्नो पार्टी राष्ट्रिय जनता पार्टी, नेपालसँग सहकार्य गरेर जान तयार रहेको पनि स्पष्ट पारे । उनले काँग्रेससँगको सहकार्य भने सम्भव नहुने पनि स्पष्ट पारे । सचिव ज्ञवालीले प्रदेश सभा र प्रतिनिधि सभा निर्वाचनको तयारीमा सरकार गम्भीर नदेखिएको आरोप समेत लगाए ।
