राष्ट्रिय अजेण्डाबारे अन्तर्राष्ट्रिय जगतलाई जानकारी गराउनु अस्वभाविक होइन: प्रम देउवा

सेतोपाटी संवाददाता

काठमाडौं, भदौ १२

संविधान संशोधन गर्ने विषयमा भारतीय प्रधानमन्त्रीसँगको संयुक्त पत्रकार सम्मेलनमा बोलेको विषयमा प्रधानमन्त्री शेरबहादुर देउवाले संसदमा जानकारी दिएका छन्।

देउवाले संसदमा विशेष समय लिएर नेपालको राष्ट्रिय एजेण्डाबारे अन्तराष्ट्रिय समुदाय र छिमेकीलाई जानकारी गराउनु अस्वभाविक नभएको बताए।

'संविधान संशोधनबारे हामीले गरेको प्रयासबारे मैले संयुक्त पत्रकार सम्मेलनमा बोलेको छु। यो विषयलाई लिएर केही राजनीतिक दल र सञ्चार माध्यमबाट आएको टिप्पणीप्रति मेरो ध्यानाकर्षण भएको छ', प्रधानमन्त्री देउवाले भने, 'नेपालको संविधान निर्माण कार्यान्वयन तथा स्वीकार्यता नितान्त नेपाल र नेपाली जनताको आन्तरिक विषय हो। यसमा कसैसँग सम्झौता गरेको छैन र हुनपनि सक्दैन। संविधानको सर्वस्वीकार्यता कायम गर्न र कार्यान्वयन गर्नु हाम्रो राष्ट्रिय अजेण्डा हुन्। राष्ट्रिय प्राथमिकता अजेण्डाबारे राष्ट्रिय अन्तराष्ट्रिय जगतलाई जानकारी गराउनु अस्वभाविक विषय होइन।'

उनले नेपालको शान्ति प्रक्रिया लोकतन्त्रको चरणमा सघाई आएका छिमेकी तथा मित्रराष्ट्रबाट पछिल्लो राजनीतिक घटनाक्रमबारे जिज्ञासा राख्नुलाई नाजायज भन्न नमिल्नेबताए।

'हाम्रो संविधान कार्यान्वयनको सम्बन्धमा छिमेकी वा अन्य कुनै मुलुकबाट हामीलाइ हस्तक्षेप स्वीकार्य हुनेछैन भन्नेबारे सदनलाइ आश्वस्त पार्न चाहन्छु,' प्रधानमन्त्री देउवाले भने।

प्रकाशित मिति: मंगलबार, भदौ १३, २०७४ १०:३३

सिफारिस