नेपाली कांग्रेसका नेता एनपी साउदले प्रदेश नम्बर २ को स्थानीय तहको निर्वाचनमा आफ्नो पार्टीले नेकपा एमालेबाहेक सबै राजनीतिक दलहरूसँग चुनावी तालमेल गर्ने गरी तयारीलाई तीव्र बनाएको स्पष्ट पारेका छन् ।
सोमबार राजधानीमा आयोजित साक्षात्कारमा बोल्दै साउदले भने,‘ पहिलो र दोस्रो चरणको निर्वाचन जस्तै तेस्रो चरणको निर्वाचनमा पनि कांग्रेसले तालमेल गर्छ तर नेकपा एमाले बाहेकका दलहरुसँग मात्रै ।’
उनले कांग्रेसले पहिलो प्राथमिकतामा राजपासँगको तालमेललाई राखेर छलफल गरिरहेको भन्दै माओवादी र अन्य मधेशवादी दलहरूसँग पनि तालमेल हुन सक्ने स्पष्ट पारे ।
साउदले दुई नम्बर प्रदेशको निर्वाचनमा तालमेल गर्नेगरी राजपासँग नेता विमलेन्द्र निधिले कुराकानी गरिरहेको भन्दै अब प्रधानमन्त्रीले पनि छलफल थाल्ने बताए ।
मधेश मधेशको आधार भूमि रहेकोले त्यहाँ कसैले कांग्रेसलाई रोक्न नसक्ने दाबी गर्दै भने,‘ मधेश कांग्रेसको जग हो । त्यहाँ सधै झै फेरि कांग्रेस नै एक नम्बर पार्टी बन्छ । हामी अहिले सबै निर्वाचनको तयारीमा पूर्ण रूपमा जुटिसकेका छौ ।’
साउदले प्रधानमन्त्री शेरबहादुर देउवाको भर्खरै सम्पन्न भारत भ्रमण ऐतिहासिक भएको दाबी गर्दै बिपी कोइरालापछि भारतसँग नेपालको राष्ट्रिय स्वार्थमा सिधा कुरा राख्न सक्ने नेता देउवा भएको दाबी गरे ।
उनले भने,‘ यो भ्रमणले मुलुकको शिर सगरमाथा जस्तै उच्च भएको छ । गर्वले नेपाली जनताको छाती फुलेको छ । यो भ्रमणले नेपाली जनताको जीत भएको छ ।
साउदले,‘ बाहिर हल्ला गरिएजस्तो राष्ट्रिय हित विपरित कुनै सम्झौता नभएकोले भ्रमणलाई अनावश्यक कुरा गरेर विवादित नबनाउन आग्रह गर्दै विश्वका ठूला ठूला देशका नेताहरूले समेत यस्ता भ्रमणमा आफ्ना देशको बास्तविकता बताउने प्रचलन रहेकोले देउवाले संविधान संसोधनको विषयमा बोल्नु उचित रहेको दाबी गरे ।
