उत्तर कोरियाले मङ्गलबार पुनःव्यालेस्टिक क्षेप्यास्त्र परीक्षण गरेपछि जापान र अमेरिकाले यस विषयमा तत्काल छलफल गर्नको लागि सुरक्षा परिषदको बैठक बोलाउन संयुक्त राष्ट्रसंघलाई आग्रह गरेको छ ।
उत्तर कोरियाले मङ्गलबार गरेको क्षेप्यास्त्र परीक्षण जापानको आकाश हुँदै उसकै समुन्द्रमा झरेपछि सो आग्रह गरिएको हो ।
उत्तर कोरियाले गरेको पछिल्लो यो क्षेप्यास्त्र परीक्षणको जापान, अमेरिका, बेलायत, अष्ट्रेलिया र दक्षिण कोरियाले निन्दा गरेका छन्।
जापानी प्रधानमन्त्री सिन्जो आबेले यस क्षेप्यास्त्र परीक्षणलाई अनौठो, गम्भीर र खतरनाक चेतावनी भएको बताउँदै संयुक्त राष्ट्र संघको आकस्मिक बैठक बोलाउन आह्वान गरेका छन्।
जापानको उत्तरी हकाइदो टापूको करिब तीन सय किलोमिटरसम्म उत्तर कोरियाली यो क्षेप्यास्त्र पुगेको थियो ।
उत्तरी कोरियाली क्षेप्यास्त्र जापानी आकाशमा पुगेपछि त्यहाँ सुचना गराउने साइरन बजेको र मानिसहरुलाई भूँइतला वा पक्की घरमा लुक्न आग्रह गरिएको थियो ।
सन् २००९ मा उत्तर कोरियाले गरेको रकेट परीक्षण जापानको आकाशमा गएको थियो। पोङयाङले यसलाई सेटलाइट परीक्षण गरेको भनेको थियो । वासिङ्गटन, सोल र टोकियोले यसलाई गैरकानूनी एक अन्तरमहादेशीय व्यालेस्टिक परीक्षण भनेको थियो ।
उत्तर कोरियाले गत आठ वर्षयता लगाताररुपमा गर्दै आएको क्षेस्यास्त्र परीक्षणहरु जापानी आकाशसम्म पुगेको यो पहिलो घटना हो ।
पोङयाङले हालै अमेरिकी मूल भूमिसम्म मार हान्न सक्ने अन्तरमहादेशीय क्षेप्यास्त्रको सफलातापूर्वक परीक्षण गरेकोे बताउँदै आएको छ ।
उत्तर कोरियाले गत शुक्रबार र शनिबार पनि छोटो दूरीमा हान्न सक्ने तीन वटा क्षेप्यास्त्र परीक्षण गरेको थियो ।
