'मसाल' छाडेर भट्टराईको पार्टीले समात्यो 'हँसिया'

सेतोपाटी संवाददाता

काठमाडौं, भदौ १४

बाबुराम भट्टराई नेतृत्वको नयाँ शक्तिले हँसिया चुनाव चिन्हमा प्रदेश २ को स्थानीय तहको निर्वाचनमा भाग लिने भएको छ। हँसिया चुनाव चिन्ह नेकपा संयुक्तको हो।

यसअघि पहिलो चरण र दोस्रो चरणको स्थानीय तहको निर्वाचनमा नयाँ शक्ति संघीय समाजवादी फोरमको चुनाव चिन्ह हातले समातेको मसाल लिएर सहभागी भएको थियो।

नयाँ शक्ति र संघीय समाजवादी फोरमबीचको एकता टुटेपछि दुई पार्टीको सम्बन्ध चिसिएको छ। पहिलो र दोस्रो चरणको निर्वाचनमा तालमेल गरेर उम्मेदवार उठाएपनि दुवै पार्टीबीच अहिले तिक्तता बढेको छ। नयाँ शक्ति नेपालका नेता केशव दाहालले केन्द्रीय स्तरमै नेकपा संयुक्तसँग तालमेलको निर्णय भएको बताए।

उनले प्रदेश नं २ को १३६ स्थानीय तहमै नयाँ शक्ति र संयुक्तले मिलेर उम्मेदवारी दिने तयारी गरिरहेको उल्लेख गरे।

नेकपा संयुक्तका जयदेव जोशीले पनि एउटै निर्वाचन चिन्हमा स्थानीय तहको तेस्रो चरणको निर्वाचनमा सामेल हुने निर्णय भएको पुष्टि गरे। 'हामीले उम्मेदवारी दिएको ठाउँमा उहाँहरुले दिनुहुन्न, उहाँहरूले दिएको ठाउँमा हामी दिन्नौँ', जोशीले भने, 'तालमेल गर्ने निर्णय भएको छ।'

प्रदेश नं २ को निर्वाचन अघि रामचन्द्र झाले पार्टी छाडेर माओवादी फर्किएपछि नयाँ शक्तिलाई उम्मेदवार छनौटसम्म समस्या रहेका छन्। यद्यपी नयाँ शक्तिले भदौ ११ गते प्रदेश नं २ मा भेला आयोजना गरेर निर्वाचन तयारी तीव्र पारिसकेको छ।

'हाम्रो हैसियत अनुसार हामी चुनावको प्रचारमा क्रियाशिल छौँ', दाहालले सेतोपाटीसँग भने, 'जिल्ला र नगर तहमा तालमेल पनि हुन सक्छन्, तालमेलको अधिकार तलसम्मै दिएका छौँ।' नयाँ शक्तिले प्रदेश नं २ मा संघीय समाजवादी पार्टी र फोरमबीचको एकतामा सामेल नभएर छुट्टै राजनीति गर्दै आएका रिजवान अन्सारीको पार्टीसँग पनि तालमेलको तयारी गरिरहेको दाहालले बताए।

'कुराकानी भैरहेको छ, तालमेल हुनसक्छ', उनले भने। त्यसो त नयाँ शक्तिको केहि अघि भएको चुनावी समिक्षा बैठकमा हातले समातेको मसाल चुनाव चिन्ह लिनु गल्ती भएको विश्लेषण केही नेताले गरेका थिए।

उनीहरूले मसाल चुनाव चिन्हकै कारण निर्वाचनमा मत कम आएको टिप्पणी समेत गरेका थिए। नयाँ शक्ति र संघीय फोरमबीच पार्टीको नाम र नेतृत्वका विषयमा विवाद भएपछि साउनको दोस्रो साता एकतामा ब्रेक लागेको थियो।

नयाँ शक्ति पार्टी छाडेर नेताहरू बाहिरिने क्रम तीव्र भएपछि स्थानीय तहको तेस्रो चरणको निर्वाचन परिचालनदेखि उम्मेदवार छनौटमा समेत नयाँ शक्ति समस्यामा छ। यद्यपी निर्वाचन प्रचारकै लागि नयाँ शक्तिका संयोजक भट्टराई केही दिनभित्रै मधेस झर्ने तयारीमा छन्। भट्टराई स्वास्थ्य उपचारपछि हाल आराम गरिरहेका छन्। प्रदेश नं २ मा आउँदो २१ गते मनोनयन दर्ताको कार्यक्रम रहेको छ। प्रदेश २ मा आउँदो असोज २ गते स्थानीय तहको तेस्रो चरणको निर्वाचन हुँदैछ।

यो पनि हेर्नुहोस्

नयाँ शक्ति र फोरमको एकतामा किन लाग्यो ‘ब्रेक’?

प्रकाशित मिति: बुधबार, भदौ १४, २०७४ १२:४६

सिफारिस