प्रदेश नम्बर दुईमा नेकपा एमालेका चुनावी कार्यक्रममाथि भइरहेको अवरोधबारे राष्ट्रिय जनता पार्टी (राजपा) नेपालका नेताहरूबीच मत बाझिएको छ। पछिल्ला दिनमा वीरगन्जदेखि जनकपुरसम्म एमाले कार्यक्रममाथि अवरोध भएपछि हामीले राजपाका दुई नेतालाई किन एमालेमाथि अवरोध गरेको भनेर सोधेका थियौं।
राजपा नेता मनिष सुमनले एमालेको मधेसी जनताप्र्रतिको हिजोको व्यवहारले उनीहरू अझै आक्रोशित रहेको त्यही आक्रोशले अवरोधको वातावरण बनेको बताए। ‘जनताको त्यो आक्रोशको हामीले नेतृत्व मात्र गरेका हौं,’ सुमनले भने, ‘एमालेले हिजो बोली, वचन र कर्ममार्फत् मधेसी जनताको अपमान गरेको थियो अहिले पनि त्यही धङधङीका साथ मधेस गएको छ। यो त्यसैको विरोध हो।’
उनले आफूहरुले शान्तिपूर्ण रूपमा प्रदर्शन गरेपनि एमाले नेताहरुको सुरक्षाका लागि स्थानीय प्रशासनले बल प्रयोग गर्ने गरेको आरोप लगाए। ‘आक्रोश पोख्न पाउनु जनताको अधिकार हो। एमालेले पनि हिम्मत भए मधेसमा राजपालाई अवरोध गरे हुन्छ,’ सुमनले भने, ‘चुनावमा त एमाले हारिहाल्छ, त्यसअघि पनि ऊ नसच्चिएसम्म मधेसी जनताले अवरोध गरिरहन्छन्।’
तर राजपा अर्का नेता केशव झाले भने पार्टी नीतिविपरित मधेसमा एमालेलाई अवरोध भएको बताए।
‘सबैलाई आफ्ना कुरा लिएर जनतामा जाने अधिकार छ, एमालेलाई अवरोध गर्ने राजपाको आधिकारीक निर्णय होइन,’ झाले भने, ‘अवरोध भएको छ भने पनि त्यो खेदजनक छ।’
उनले अर्को दलको चुनावी कार्यक्रमा अवरोध गर्नु राजनीति नभई गुण्डागर्दी हुने बताए। ‘हामीले सकेको ठाउँमा हामीले अवरोध गरौंला, एमाले बलियो भएको ठाउँमा उनीहरुले हामीलाई लखेट्लान्। यसले त चुनाव हिंसात्मक हुन्छ, त्यसैले यस्तो अवरोध रोक्नुपर्छ भनेर मैले सबै जिल्ला अध्यक्षलाई भनेको छु,’ झाले भने, ‘तर पहिलाका छ वटा पार्टी मिलेर बनेको पार्टी भएकाले केही साथीहरूका फरक मत पनि छन्।’
यसअघि सोमबार वीरगन्ज र मंगलबार जनकपुरमा एमाले नेता माधवकुमार नेपाल सहभागी कार्यक्रममा राजपा नेता÷कार्यकर्ता अवरोध प्रयास गरेका थिए। जनकपुरको पिडारी चोकमा एमाले सभा चलिरहँदा राजपा कार्यकर्ताले नाराबाजी गर्दै कालो झन्डा देखाएका थिए। प्रहरीले हस्तक्षेप गरेर उनीहरुलाई हटाउनु परेको थियो।
यसैबीच एमाले अध्यक्ष केपी शर्मा ओलीले एमाले पनि अवरोधमा ओर्लियो भने नराम्रो हुने चेतावनी राजपालाई दिएका छन्। थाइल्याण्डमा स्वास्थ्य परीक्षणका बुधबार स्वदेश फर्केका ओलीले त्रिभुवन अन्तर्राष्ट्रिय विमालस्थलमा भने,‘उहाँहरूलाई(राजपालाई) म भन्न चाहन्छु, उहाँहरूले निषेधको राजनीति गरिरहनु भएको छ। उहाँहरूजस्तै गरी एमाले ओर्लियो भने के हुन्छ?’
एमाले आवेश उत्तेजनामा नआउने तर डरपोक र कायर भएर पनि नभाग्ने उनले बताए।
‘एमालेले प्रतिवादको बाटो समाउन नपरोस्,’ ओलीले भने।
