कानून, न्याय तथा संसदीय मामिला मन्त्री यज्ञबहादुर थापाले प्रदेश सभा र प्रतिनिधि सभाको निर्वाचन कानून ल्याउन अब ढिलाई नहुने बताएका छन् ।
मन्त्री थापाले कानूनको अभावमा प्रदेश सभा र प्रतिनिधि सभाको निर्वाचन प्रभावित नहुने पनि स्पष्ट पारे। बिहिबार काठमाडौंमा संचारकर्मीमाझ संक्षिप्त प्रतिक्रिया दिँदै उनले प्रदेश सभा र प्रतिनिधि सभाको निर्वाचन कानून आउन ढिलाई भएको पनि स्वीकार गरे । उनले दुवै निर्वाचनका लागि आवश्यक कानून ल्याउन खबरदारी भने गरिरहनपर्ने पनि उल्लेख गरे ।
मन्त्री थापाले राज्य व्यवस्था समितिमा विचाराधीन दुवै विधेयकमाथि दलहरूबीच घनीभूत छलफल भइरहेको जानकारी पनि दिए । काँग्रेस नेता समेत रहेका मन्त्री थापाले स्थानीय तह निर्वाचनमा काँग्रेस पहिलो शक्ति दाबी गरे ।
