डिआइजी सिलवालको मुद्दामाथि अब १२ दिनपछि फैसला हुने

सेतोपाटी संवाददाता

काठमाडौँ, १५

नेपाल प्रहरीको महानिरीक्षक नियुक्तिमा आफूलाई अन्याय भएको भन्दै डिआइजी नवराज सिलवालले दायर गरेको मुद्दाको निर्णय सर्वोच्च अदालतले भदौ २७ गते सुनाउने भएको छ।

सिलवालको रिटमाथि अन्तिम सुनुवाई आजै सकिएको हो। यो मुद्दाको सुनुवाई प्रधानन्यायाधीश गोपाल पराजुलीसहित न्यायाधीशहरू ओमप्रकाश मिश्र, केदारप्रसाद चालिसे, शारदाप्रसाद घिमिरे, मिरा खड्का, प्रकाशमान सिंह राउत, पुरुषोत्तम भण्डारीको पूर्ण इजलासमा भइरहेको छ।

गत फागुनमा सरकारले बरीयतामा अगाडि रहेका सिलवाललाई छोडर पछि रहेका डिआइजी जयबहादुर चन्दलाई प्रहरी प्रमुखमा नियुक्त गर्ने निर्णय गरेको थियो। सो निर्णयलाई सर्वोच्चले लागू नगर्न आदेश दिएको थियो।

सर्वोच्चको आदेशपछि सरकारले अर्का डिआइजी प्रकाश अर्याललाई आइजीपी बनाउने निर्णय गरेको थियो। डिआइजीले सिलवालले कार्यसम्पादन र मूल्यांकनका आधारमा आफू अर्यालभन्दा पनि अगाडि रहेको भन्दै फेरि सर्वोच्चमा रिट हालेका थिए।

यसअघि पटक-पटक सर्दै आएको मुद्धामा आज बृहत पूर्ण इजलासमा सुनुवाई सुरू भएको हो।

प्रकाशित मिति: बिहीबार, भदौ १५, २०७४ १८:००

सिफारिस