नेपालका लागि भारतीय राजदूत मज्जिब सिंह पुरीले नेपालमा अब प्रगतिको दिनहरू सुरू भएको बताएका छन् । ‘नेपालमा अहिले प्रगतिका संकेतहरु देखा परेका छन्, यो मेरो लागि खुशीको कुरा हो,’ राजदूत पुरीले भने। मंगलबार काठमाडौंमा नेपाली रेडियो नेटवर्कको प्रथम वार्षिकोत्सवको अवसरमा आयोजित एक कार्यक्रममा बोल्दै राजदूत पुरीले यस्तो बताएका हुन् । भारत नेपालको विकास र समृद्धिको लागि जस्तोसुकै सहयोग गर्न तयार रहेको पनि उनले विश्वास दिलाए।
उनले नेपालले आज दोस्रो संविधान दिवस मनाएकोप्रति खुशी व्यक्त गर्दै भने,‘संविधान दिवस मनाउनु खुशीको कुरा हो, तर म अरु राजनीतिक विषयमा कुनै पनि टिकाटिप्पणी गर्न चाहन्न ।’
त्यस्तै उनले नेपाली रेडियोलाई प्रथम वर्ष पूरा गरि दोस्रो वर्षमा टेकेको भन्दै बधाई एवम् आगामी दिनमा अझै धेरै सफलताको लागि शुभकामना दिए । उनले भने,‘यो रेडियोको देशव्यापी रुपमा ठूलो सञ्जाल रहेको छ, अझ यसको चर्चित कार्यक्रम नेपाली बहस त देशका सारा नेपाली जनताले अत्यन्तै मन पराएको देखें, यसको एउटै कारण हो ऋषि धमलाजी हो, उहाँको सक्रियता र क्षमता अदभुत छ, यसबाट म बास्तवमा निकै प्रभावित छु, त्यसैले उहाँको सम्मानमा उपस्थित् तपाई सम्पूर्णलाई ताली बजाएर उहाँलाई अभिनन्दन गरिदिन आग्रह गर्दछु।’
पुरीले संविधान दिवस र नेपाली रेडियो नेटवर्कको बार्षिकोत्सवको अवसरमा एकमुष्ट शुभकामना दिए । संविधान दिवसको अवसरमा नेपाली जनता र नेताले बिगत केही बर्षभित्रै नेपाललाई परिवर्तन गरेर देखाउनेमा आफु विश्वस्त रहेको पनि उनको भनाई थियो ।
नेपालीहरुको नजिकिँदै गरेका दशैं, तिहार र छठ जस्ता चाडपर्वहरुको शुभकामना दिँदै राजदुत पुरीले भने,‘नेपालमा राजनीति स्थायी हुनुपर्छ, अनि मुलुकले दिगो विकासको लक्ष्य चुम्छ, राजनीतिक दलहरुले ईमान्दार भएर मुलुकको भविष्य बनाउनुपर्छ।’
उनले संविधान दिवसको दिन पारेर रेडियो खोलिनु खुशीको कुरा भएको उल्लेख गर्दै भने,‘यो गौरवको कुरा हो, यसको पहुँच र प्रभाव धेरै छ, अब हामी नेपालीहरुको प्रगति र उन्नतीको लागि रेडियोको भूमिका हुन्छ।’
उनले पूनः दोहोर्याएर भने,‘सबैको घरमा यो र्डियो बजिरहेको छ, यसको देशव्यापी सञ्जाल विस्तार भयो, यसको लागि म ऋषि धलालाई धन्यवाद दिन्छु।’
