निरन्तरको वर्षाका कारण मर्स्याङ्दीमा आएको बाढीले भासिएको झोलुङ्गे पुलको लठ्ठा काटिएको छ।
तनहुँको आँबुखैरेनी गाउँपालिका–२ एक्लेफाँट र गोरखा नगरपालिका–१४ जोड्ने झोलुङ्गे पुल बिहीबार राति आएको बाढीले भासिएको थियो।
पुलमा थप जोखिम हुन नदिन शनिबार लठ्ठा काटिएको तनहुँका निमित्त प्रमुख जिल्ला अधिकारी चित्राङ्गत बरालले बताए।
बाढीले तनहुँतर्फको पुलको भाग भासिएर नदीमा पुगेको थियो।
‘पुल मर्मत नभइञ्जेल थप जोखिम हुन नदिन पुलको लठ्ठा काटिएको छ’, बरालले भने। पुलबाट दैनिक सयौँ सर्वसाधारण वारपार गर्दथे।
गोरखास्थित अकला मन्दिर जाने बाटो पनि यही पुल थियो। पुल भत्किएपछि सर्वसाधारणलाई आवतजावतमा समस्या भएको छ।
