छोराका दुबै मिर्गौला फेल भएपछि कुन आमाको मन रुँदैन र? अहिले त्यस्तै भएको तनहुँको व्यास नगरपालिका–१२ छिर्कनेकी कुमारी क्षेत्रीलाई।
२८ वर्षीय अनुप क्षेत्रीको विगत दुई वर्षदेखि मिर्गौलाले काम गर्न छाडेपछि उनको मुहारमा खुशी छैन। छोरालाई कसरी बचाउने भन्नेमा उनी चिन्तित छिन्। उनले छोरा बचाउनका लागि आफ्नो मिर्गौला दान गर्दै छिन्।
त्रिवि शिक्षण अस्पतालमा परीक्षण गरेपछि उनको मिर्गौला छोरालाई प्रत्यारोपण गर्न मिल्ने भएको बुबा पदमबहादुर क्षेत्रीले बताए।
यसअघि प्रकाशित समाचार राष्ट्रिय समाचार समितिबाट लिइएको थियो। उक्त समाचारमा बिरामीका बुवा पदमबहादुरले छोराको मिर्गौला प्रत्यारोपण गर्न १२ देखि १५ लाख खर्च लाग्ने चिकित्सकले बताएको उल्लेख गरेका थिए।
त्रिवि शिक्षण अस्पतालका डाक्टर पवनराज चालिसेले भने अहिले सरकारी अस्पतालहरूमा मिर्गौला नि:शुल्क प्रत्यारोपण हुने बताएका छन्।
‘सरकारले मिर्गौला प्रत्यारोपणका लागि साढे ४ लाख रुपैयाँ दिने गरेको छ। मिर्गौला प्रत्यारोपण हुने सबै सरकारी अस्पतालमा यो सुविधा छ। सरकारले दिने सबै रकम प्रत्यारोपणमा खर्च नभए हामी बचेको पैसा बिरामीलाई पोष्ट सर्जरीका लागि दिइदिन्छौं,’ डाक्टर चालिसेले भने।
डुम्रेस्थित एक कम्पनीमा काम गर्दैगर्दा अनुपका मिर्गौलामा समस्या आएको थियो। परीक्षण गराउँदा दुबै मिर्गौला फेल भएको पत्ता लागेको थियो। त्यसयता उहाँ नियमित डायलासिस गराउँदै आएका छन्।
स्वास्थ्यमा सुधार नआएपछि चिकित्सकले प्रत्यारोपणको सुझाव दिएका थिए।
अनुपका उपचारमा सघाउन विभिन्न व्यक्ति तथा सङ्घसंस्थाले सहयोग गर्दै आएका छन्। हालसम्म आठ लाख रुपैयाँ सङ्कलन भइसकेको छ।
एक लाख सहयोग
अनुपको मिर्गौला प्रत्यारोपणका लागि शान्तिदीप युवा क्लबले रु एक लाख हस्तान्तरण गरेको छ।
व्यास–६ शिशाघाटस्थित युवा क्लबले सो सहयोग गरेको हो। क्लबको तर्फबाट सङ्कलित रु ९१ हजार, युवा सङ्घ व्यास नगरका संयोजक कृष्णकुमार श्रेष्ठको तर्फबाट रु पाँच हजार र आले फर्निचरका प्रोपाइटर केशर आलेबाट चार हजार गरी रु एक लाख पीडितलाई हस्तान्तरण गरिएको छ।
क्लबका अध्यक्ष सूर्यप्रसाद छिमालले विभिन्न व्यक्ति तथा सङ्घसंस्थाको सहयोगमा रकम सङ्कलन गरिएको बताए। मिर्गौला पीडित अनुपको बारेमा जानकारी पाएपछि रकम सङ्कलन गरिएको र उक्त रकमले पीडितका उपचारमा सहयोग पुग्ने उनले विश्वास व्यक्त गरेका छन्।
*शीर्षक र समाचार सम्पादन गरिएको।