वि.सं २०७७ साउनमा आएको बाढीपहिराका करणले विस्थापित भएका कालिकोट जिल्ला नरहरिनाथ गाउँपालिका-४ भाटगाउँ, खाती रुप्सा, पाङ र वडा नं ७ बागाछान्ना र घोडेसिल्ला गाउँमा चार करोड रुपैयाँ लागतमा १०१ घर निर्माण हुने भएका छन्।
बाढीपहिरो विस्थापित घरपरिवारलाई चालु आर्थिक वर्षमा नै नरहरिनाथ गाउँपालिकाको वडा नं ४ को डाँडासुन्दर बस्तीमा १०१ घर निर्माण हुने भएका हुन्।
विसं २०७७ मा आएको बाढीपहिराका कारणले नरहरिनाथ गाउँपालिकामा १६ जनाले ज्यान गुमाएका थिए भने २०६ घरपरिवार विस्थापित भएका थिए।
विस्थापित भएकामध्ये आर्थिक वर्षमा एक करोड ७० लाख रुपैयाँ लागतमा ५५ घर निर्माण गरिएका र थप १०१ घर निर्माण गरिने गाउँपालिकाकी उपाध्यक्ष मनशोभा बुढाले जानकारी दिइन्।
'गत आवमा कर्णाली प्रदेश सरकारको सहयोगमा ५५ घर निर्माण गरेर एकीकृत बस्ती बसालेका छौं', उनले भननि्, 'थप त्यही ठाउँमा चालु आवमा १०१ घर निर्माण हुनेछन्।'
नमूना बस्तीमा ४० लाख रुपैयाँ विद्यालय भवन निर्माण हुने र प्रधानमन्त्री रोजगार कार्यक्रमबाट २६ लाख रुपैयाँ लागतमा विद्यालयको फिल्ड निर्माण गरिने उपाध्यक्ष बुढाले बताइन्।
'हामीले नमूना बस्तीमा ५५ घर निर्माण गरेर समुदायलाई हस्तान्तरण गरिसकेका छौं। खानेपानी, विद्यालय निर्माणलगायत भौतिक पूर्वाधारका संरचना निर्माण गरिसकेका छौं', उनले भनिन्, 'बस्ती पुनर्निर्माणको कामलाई यथाशीघ्र बढाई समयमै काम सम्पन्न गर्ने गरी कामको थालनी भएको छ।'
गाउँपालिकाभरि बाढीपहिराबाट पूर्णरूपमा क्षति भएका घरको पुनर्निर्माणका काम थालनी गरिने त्यसका लागि वडा कार्यालयमार्फत् लगत संकलन भइरहेको उपाध्यक्ष बुढाले जानकारी दिइन्।
'हामीले पूर्णरूपमा क्षति भएका घरको गाउँपालिकाले १० प्रतिशत लगानी गर्ने र बाँकी संघीय सरकारसँग सहयोगका लागि पहल गर्ने योजना छ', उनले भनिन्, 'त्यसका जिल्ला प्रशासन कार्यालयमार्फत् अहिले पहल थालिएको छ।'
जिल्ला विपद् व्यवस्थापन समितिका संयोजकसमेत रहेका कालिकोटका प्रमुख जिल्ला अधिकारी, जिल्ला प्रहरी कार्यालयका प्रमुख र विपद् व्यवस्थापन समितिका अन्य पदाधिकारीले बाढीपहिरो पीडितसँग भेटघाट तथा गत आवमा बनेका घरको अनुगमन साथै नयाँ बन्ने घर निर्माणका लागि समुदायसँग भेटघाट गरिएको उपाध्यक्ष बुढाले जानकारी दिइन्।
