म्याग्दीको रघुगङ्गा गाउँपालिका–४ दग्नाममा आज पहिराले चालकसहित स्काभेटर पुरिएको छ।
तुदी पावर कम्पनीद्वारा निर्माणाधीन ४८.५ मेगावाट क्षमताको अपर राहुघाट जलविद्युत आयोजनाको सडक निर्माणका क्रममा चालक र स्काभेटर पुरिएको जिल्ला प्रहरी कार्यालयले जनाएको छ।
प्रहरी निरीक्षक वीरेन्द्रराज गुरूङले स्काभेटर चालक रघुगंगा–२ का अन्दाजी २७ वर्षका भीमबहादुर खत्री पहिरामा पुरिएको जानकारी दिए।
'अर्को स्काभेटरको सहायताले पुरिएको स्काभेटर र चालकको खोजी भइरहेको छ', उनले भने, 'सडक खनिरहेको अवस्थामा एक्कासि पहिरो खसेर पुरिएको हो।'
प्रहरी निरीक्षक गुरूङसहितको सुरक्षाकर्मी, आयोजनाका कर्मचारी, मजदूर र स्थानीयबासी पुरिएको स्काभेटर र चालकको खोजीमा जुटेका छन्।
