अत्यावश्यक औषधि मध्येको सिटामोल यतिबेला हुम्लाको सर्केगाड गाउँपालिका- ४ स्थित साया स्वास्थ्यचौकीमा पाइँदैन।
नेपाल सरकारले निःशुल्क वितरण गर्ने औषधि अभाव हुँदा बिरामी समस्यामा पर्दै आएका छन्। साया स्वास्थ्यचौकीमा बिरामी उपचारका लागि जाँदा सामान्य सिटामोलसमेत नपाउने गरेको गुनासो गर्न थालेका छन्। मौसमी ज्वरोका कारण गाउँमा अधिकांश बालबालिका र वृद्धवृद्धालाई बढी समस्या बनाएको स्थानीयबासीको गुनासो छ।
स्वास्थ्यचौकीमा औषधि पाइन छाडेपछि सर्केगाडका सर्वसाधारण्लाई सास्ती खेप्नु परेको स्वास्थ्यकर्मीले बताएका छन्। कोरोना भाइरस सङ्क्रमण (कोभिड- १९) का बिरामीका लागि पनि अत्यावश्यक औषधि मानिने सिटामोलको अभाव देखिएको छ भने ज्वरोका विरामीहरू औषधि नपाएर घर फर्किनु परेको अवस्था आइपरेको स्वास्थ्यकर्मीको भनाइ छ।
स्वास्थ्यचौकीमा उपचार तथा औषधि लिन पुग्दा स्वास्थ्यकर्मीले औषधि छैन भन्दै फिर्ता पठाउने गरेका छन्। सो स्वास्थ्यचौकीमा दैनिक १५ देखि २० जनासम्म बिरामी उपचार गर्न जाने गरेको बताइएको छ।
पछिल्लो समय मौसममा आएको परिवर्तनका कारण सो स्वास्थ्य संस्थामा ज्वरोका बिरामी बढेका छन्।
'केही औषधि पसलहरूले समेत सिटामोल आफ्नो नजिकको ग्राहकलाई दिन स्टक गरी राख्दा उपलब्धतामा थप समस्या देखिएको हो,' स्वास्थ्यचौकीका अनमी बिजौरा शाहीले भनिन्।
व्यवस्थापनमा सरकारी निकायका कमजारीले देशभर जीवनरक्षक औषधि अभाव रहेको आरोप स्थानीयबासीको छ।
'गाउँभरि सिटामोलको अभाव छ। स्वास्थ्य चौकीमा समेत सिटामोल छैन,' उनले भनिन्।
गाउँपालिकाको दूरदर्शिता नभएकाले यो समस्या आएको स्वास्थ्यकर्मीको आरोप छ। सिटामोल जस्तो अत्यावश्यक औषधि नहुनुमा गाउँपालिकाले समयमै यसतर्फ ध्यान नदिनु मुख्य कारण भएको उनीहरूको भनाइ छ।
सो स्वास्थ्यचौकीमा अस्थायी साधनसँग सम्बन्धित पिल्सहरू पनि नभएको अनमी बिजौरा शाहीले बताइन्। यसका साथै सलायन पनि नभएको उनको भनाइ छ।
प्रायः टाउको दुख्ने, ज्वरो आउने, जीउ दुख्ने लगायतका समस्या लिएर स्वास्थ्यचौकीमा आउनेहरू सिटामोल, एमोसिलिनजस्ता औषधि नहुँदा थप समस्या बनाएको शाहीले बताइन्।
यस्तै हिउँदको समयमा दमका बिरामी स्वास्थ्यचौकीमा बढी आउने गरेको भए पनि उनीहरूलाई आवश्यक पर्ने औषधिसमेत नभएको बताइएको छ।
स्वास्थ्यचौकीका अहेब धर्मराज शाहीले औषधि अभाव हुँदा नागरिकको गाली आफूहरूले खानुपर्ने अवस्था आएको बताए। उपचारका लागि आएका बिरामीलाई औषधि छैन भन्दा जानेबुझेका फिर्ता हुने गरे पनि नबुझेका केहीले गाली गर्नेको उनको भनाइ छ।
शाहीका अनुसार स्वास्थ्यचौकीमा औषधि अभाव भए पनि आफूहरू नियमित कार्यालयमा आउने गरेको र उपचारका लागि यहाँ आउने बिरामीलाई औषधि छैन भन्दा उनीहरूले रिसाउने र गाली गर्ने गरेका छन्।
औषधि अभाव हुँदा अहिले आफूहरूको काम कार्यालय खोल्ने र बन्द गर्ने मात्र भएको उनको भनाइ छ।
