पाँचथरको फालेलुङ गाउँपालिका–६ बरभञ्ज्याङमा आगलागी हुँदा तीन घर जलेका छन्।
बरभञ्ज्याङका जीतबहादुर मेयोङ्बाको घरबाट सुरु भएको आगलागी फैलँदा गए राति रामजीत राई र मनबहादुर राईका घर जलेका हुन्।
आगलागीमा तीन घरमा रहेको आइएमईको कार्यालयसहित आधा दर्जन बढी पसल जलेको स्थानीय खगेन्द्र राईले जानकारी दिए।
आगलागी नियन्त्रणका लागि फिदिममा रहेका दुई दमकलको सहायता लिइएको थियो।
बरभञ्ज्याङ फालेलुङ–६ को केन्द्रका रुपमा रहेको बजार हो।
विद्युत् सर्ट भई आगलागी भएको स्थानीयको अनुमान छ।
