जिल्ला ट्राफिक प्रहरी कार्यालय खोटाङले नौ महिनाको अवधिमा ३९ लाख ५२ हजार रुपैयाँ राजश्व संकलन गरेको छ। ट्राफिक निमय उल्लंघन गर्ने सवारीसाधनका चालकलाई कारबाही गर्दा सो राजश्व संकलन भएको हो।
विभिन्न ठाउँमा खटिएका ट्राफिक प्रहरी टोलीले गत साउनदेखि चैत मसान्तसम्मको अवधिमा पाँच हजार ४०१ सवारी साधनका चालकलाई कारबाही गरेको थियो।
साउनमा दुई लाख ६३ हजार रुपैयाँ, भदौमा चार लाख ४४ हजार रुपैयाँ, असोजमा चार लाख सात हजार रुपैयाँ, कात्तिकमा ६ लाख ५३ हजार रुपैयाँ, मंसिरमा सात लाख दश हजार रुपैयाँ, पुसमा तीन लाख ७८ हजार रुपैयाँ, माघमा तीन लाख ७९ हजार रुपैयाँ, फागुनमा तीन लाख ६३ हजार रुपैयाँ र चैतमा तीन लाख २४ हजार रुपैयाँ राजस्व संकलन भएको जिल्ला ट्राफिक प्रहरी कार्यालयका प्रमुख दलबहादुर खत्रीले जानकारी दिए।
ट्राफिक प्रहरीका अनुसार सवारीचालक अनुमतिपत्र नलिएका, साथमा आवश्यक कागजात नबोकेका, मादक पदार्थ सेवन गरेका, स्वरुप परिवर्तन, तीव्र गति र क्षमताभन्दा बढी लोड गरी चलाइएका, हेल्मेट, सिटबेल्ट र चालक पोसाक प्रयोग नगरेका सवारीसाधनका चालकलाई कारबाही गरिएको हो।
यस्तै जिल्लामा नौ महिनाको अवधिमा १९ सवारीसाधन दुर्घटना भएको जिल्ला ट्राफिक प्रहरी कार्यालयले जनाएको छ। विभिन्न समयमा भएका सवारी दुर्घटनामा पाँच जनाको मृत्यु भएको थियो भने २३ जना घाइते भएका थिए। अधिकांश सवारी साधन ट्राफिक नियमविपरीत चलाउँदा दुर्घटनामा परेको पाइएको खत्रीले बताए।
