दयाहाङ राई अभिनित ‘आप्पा’ सिनेमाको नयाँ गीत ‘अमला’ रिलिज भएको छ । गीत रिलिजसँगै सिनेमाको नयाँ रिलिज मिति पनि सार्वजनिक गरिएको छ ।
यसअघि जेष्ठ २४ गते रिलिज हुने भनिएको ‘आप्पा’ अब असार १३ गतेबाट नेपालभरका सिनेमा घरमा रिलिज हुनेछ ।
'अमला' बोलको गीतमा हर्क साउदको शब्द, एसडी योगी र सुशान्त गौतमको संगीत रहेको छ। गीतमा मेलिना राई र एसडी योगीको युगल स्वर छ ।
सिनेमाको सार्वजनिक गीतको निर्देशक रेनेशा वान्तवा राई हुन् । गीतको भिडियोलाई किरण थापा, बुद्ध लामा र सुरैन राईले कोरियोग्राफी गरेका हुन् । रवी न्यौपानेले छायाँकन गरेको गीतलाई निमेष श्रेष्ठले सम्पादन गरेका हुन् ।
बाबु छोराको सम्बन्धको कथामा निर्माण भएको सिनेमाका निर्देशक अनमोल गुरुङ हुन् । अनमोलले यसै सिनेमाबाट निर्देशनमा डेब्यू गर्दैछन्।
सिनेमामा दयाहाङ राई, सिद्धान्त राज तामाङ र अल्लोना काबो लेप्चाका अलवा वरिष्ठ निर्देशक तथा निर्माता तुलसी घिमिरे, अरुणा कार्की लगायतका कलाकारको समेत मुख्य भुमिका रहेको छ ।
‘आप्पा’मा निर्देशक अनमोल गुरुङको कथा, अनमोल गुरुङ र उमेश उपमाको पटकथा तथा संवाद, शैलेन्द्र डि कार्कीको छायाँकन, अनमोल गुरुङ र शैकात देवको संगीत, निमेष श्रेष्ठको सम्पादन सिनेमामा रहेको छ ।
