सनम कुमार बैराग निर्देशित फिल्म 'कैदीको पत्र' को ट्रेलर सार्वजनिक भएको छ।
बुधबार ओएसआर डिजिटल युट्युब च्यानलमार्फत फिल्मको ट्रेलर सार्वजनिक गरिएको हो। सार्वजनिक ट्रेलरमा एक युवकको प्रेम सम्बन्धमा आउने उतार-चढावलाई चित्रण गरिएको छ।
प्रेम र रोमान्सको कथामा बनेको फिल्मले जीवनमा पाएको खुसीलाई सम्हाल्न नसक्दा मानिसले व्यहोर्नुपर्ने उतारचढाव र भोग्नुपर्ने कठिनाइलाई चित्रण गरेको निर्देशक बैरागले बताए।
सम्पूर्ण छायांकन स्कटल्याण्डमा भएको फिल्ममा समावेश सबै गीतमा शब्द, फिल्मको पटकथा तथा संवाद निर्देशक बैरागले नै तयार पारेका हुन्।
यो फिल्म ईश्वर मानन्धरले लेखेको कथा 'कैदीको पत्र' मा आधारित छ।
फिल्ममा कुनाल विश्व, ब्रिटिश अभिनेत्री म्याडिसन लाजारस, सलिना थापा मगर, पृथ्वीराज खत्री, सुवर्ण थापा, मनिष श्रेष्ठ, सुस्मिता थापा, क्यारी डोड्स, किरण कार्की, चरण प्रधान, विजेता श्रेष्ठ, फौस्तास तलग्का, लारेनवेस्टबरी, तपस्या शिवाकोटीलगायत कलाकारको अभिनय छ।
दिल घले, नानी बैराग, कैलाश विश्वकर्मा र हिराल जोशी फिल्मको निर्माता हुन्। रामेश्वर कार्कीले छायांकन गरेको फिल्मलाई अर्जुन जिसीले सम्पादन गरेका छन्।
सुरेश सेन्चुरी र विनम्र कर्माचार्यको संगीत रहेको फिल्ममा प्रताप दास, अन्जु पन्त, सागर आले, प्रविशा अधिकारी, सुबानी मोक्तान र अभिषेक कार्कीको स्वर रहेको छ।
यो फिल्म वैशाख १५ गतेदेखि प्रदर्शन हुनेछ।
