बलिउड अभिनेत्री तापसी पन्नूले आफ्नो ‘ट्रोल’ बनाउने व्यक्तिलाई कडा जवाफ फर्काएकी छन्। फिल्म 'थप्पड'बाट चर्चामा कमाएकी तापसीले आफ्नो ट्विटरमा प्रतिक्रिया जनाउँदै आफूलाई होच्याउने व्यक्तिलाई सार्वजनिक रुपमै दरिलो जवाफ फर्काएको हिन्दुस्तान टाइम्सले लेखेको छ।
तापसीले आइतबार बिहान एउटा व्यंग्यात्मक ट्विट गरेकी थिइन्। जसमा उनले लेखेकी छन्, ‘अन्ततः कोरोनाको पनि उपचार सम्भव भयो। तर गलत धारणा राख्ने र अति आत्मविश्वास हुनेहरुलाई ठिक पार्ने औषधि छैन। ह्यास्ट्याग सन्डेथट्स।’
तापसीको यो ट्विटमा एक जना ट्विटर प्रयोगकर्ताले कमेन्ट गरेका छन्। उनले भनेका छन्, ‘सबैको उपचार हुन्छ। त्यतिन्जेल तिमीले चैं आफ्नो ख्याल राख्नू।’
ती प्रयोगकर्ताको यस्तो प्रतिक्रियामा उनी मौन बसिनन्। रिट्विट गर्दै तापसीले जवाफ फर्काइन्, ‘सर, ख्याल राखेकै नतिजा त हो कि हामीजस्ता केही व्यक्तिहरू अझ अडेर बसेका छौं। नभए कति मान्छे हाम्रो मानसिक सन्तुलन बिगार्ने कोसिसमा लागिपरेका छन्।’
तापसीले हिन्दी भाषामैं जवाफ फर्काउँदै भनेकी छन्, ‘अनि साच्चै, तपाईंको शुभकामना र चिन्ताका लागि धन्यवाद! जबसम्म तपाईंजस्तो व्यक्ति हुनुहुन्छ, हामीलाई हाम्रो स्वास्थ्य र सोचाइमा पूर्ण विश्वास छ।’
हालै तापसीको नयाँ फिल्म ‘रश्मि रकेट’को तयारी सकिएको छ। फिल्ममा उनी खेलाडीको भूमिकामा देखिनेछिन्। आकर्ष खुरानाको निर्देशन रहेको यो फिल्म सन् २०२० मै सार्वजनिक हुने भनिएको थियो। तर कोरोना महामरीका कारण सार्वजनिक हुन पाएको थिएन। फिल्म सन् २०२१ मा सार्वजनिक हुने अनुमान लगाइएको छ।
‘स्याबास् मिठु’, ‘लुप लपेटा’ र ‘हसिना दिलरुबा’ तापसीका आगामी फिल्म हुन्। राहुल ढोलकियाद्वारा निर्देशित ‘स्याबास् मिठु’ सन् २०२१ फेबुअरी ५ मा सार्वजनिक हुने घोषणा भएको छ। फिल्म ‘लुप लपेटा’ जनवरी २९ मा सार्वजनिक हुने भनिएको छ भने ‘हसिना दिलरुबा’को सार्वजनिक मिति तोकिन बाँकी छ।
