‘हिट एन्ड रन’मा हलिउडकी गायिका निक्की मिनाजका बुवाको मृत्यु भएको छ।
शुक्रबार राति मिनाजका बुवा रोबर्ट मराज न्युयोर्कको लङ आइल्यान्डस्थित सडकमा हिँडिरहेका बेला कारले उनलाई ठक्कर दिएर भागेको बिबिसीले जनाएको छ।
दुर्घटनापछि ६४ वर्षीय मराजलाई अस्पताल लगिएको थियो। जहाँ उनलाई अर्को दिन शनिबार चिकित्सकले मृत घोषणा गरिदिए।
नास्साउ काउन्टी पुलिस डिपार्टमेन्टका अधिकारीका अनुसार यस घटनामा प्रहरीले अनुसन्धान अघि बढाएको छ।
यसबारेमा निक्की मिनाजले बोलेकी छैनन्। प्रहरी प्रवक्ताले एपिएफसँग मृतक निक्की मिनाजका बुवा भएको पुष्टि गरेका छन्।
निक्की मिनाजको वास्तविक नाम ओनिका तान्या मराज-पेट्टी हो। उनी ट्रिनिदा र टोबागोमा जन्मिएकी हुन्। उनी न्युयोर्क सिटीको क्विन्समा हुर्किएकी थिइन्।
उनी १० ग्रामी अवार्डका लागि मनोनित भइसकेकी छिन्। त्यस्तै, पाँच एमटिभी भिडिओ म्युजिक अवार्ड पनि जितेकी छन्।
उनले सांगीतिक करिअरबाट सन् २०१९मै सन्यास लिने घोषणा गरेकी थिइन्। तर, पनि उनी सक्रिय नै छिन्।
