ट्रि इन्टरटेन्मेन्टको प्रस्तुतिमा लोक शैलीको 'पीपल डाँडे साइँली' बोलको गीत सार्वजनिक भएको छ।
बुधबार काठमाडौंमा एक कार्यक्रम गर्दै गीत सार्वजनिक गरिएको हो। गायक प्रेमराजा महत र गायिका अस्मिता परियारको स्वर रहेको गीतको शब्द तथा संगीत पनि गायक प्रेमराजाले नै तयार पारेका हुन्।
दीपक नेपालीले निर्देशन गरेको गीतको भिडिओमा गायक प्रेमराजा महत, दीपाश्री निरौला, डेलविस, राज, जुना सुन्दास र सलिना खत्रीको नृत्य छ। नवराज उप्रेतीले छायांकन गरेको गीतको भिडिओलाई प्रविण भट्टले सम्पादन गरेका छन्।
दिनेश दर्शनधारी, यशोधा राई र सुवर्ण महर्जनको लगानीमा बनेको गीतलाई मौसम हिमालीले कोरियोग्राफी गरेका हुन्।
कार्यक्रममा बोल्दै कलाकार दीपाश्री निरौलाले प्रेमराजा महतसँग पहिलो पटक सहकार्य गर्न पाउँदा खुशी लागेको बताइन्।
'यो गीत लेख्दा एक मोहरमा २ दाना अम्बा पाइन्थ्यो। अहिले समय फेरिसक्यो। यो गीतले ४ दशक अगाडिको जनजीवनलाई चित्रित गर्छ,' गायक महतले भने।
उनले 'बाँझो खेतमा, हिउँचुलीमा हिउँ, विदेशीको हरियो डलर' जस्ता चर्चित गीतमा आवाज दिएका छन्।
