बलिउड अभिनेता शाहिद कपुरको फिल्म 'कबीर सिंह' उनको करिअरकै सफल फिल्म हो।
विभिन्न आलोचनाका बाबजुद यो फिल्म वर्षकै सबभन्दा धेरै कमाउने दोस्रो फिल्म बन्यो। दर्शकहरूले पनि निकै मनपराएका फिल्मले शाहिद कपुरको करिअरलाई नयाँ उचाइ पनि दियो। फिल्म हिट भएसँगै उनको पारिश्रमिक बढ्यो।
तर धेरैले उनको पारिश्रमिकका साथै घमन्ड पनि बढेको टिप्पणी गरेका छन्। यसका पछाडि पनि कारण छ। हालै भएको एउटा अवार्ड समारोहमा शाहिद रिसाएर हिँडेका थिए। उनलाई उत्कृष्ट अभिनेताको अवार्ड नदिइएको भन्दै उनी समारोह छाडेर बाहिरिएका भारतीय सञ्चारमाध्यमले जनाएका छन्।
शाहिदको यो व्यवहार देखेर सबै छक्क परेका थिए। सञ्चारमाध्यम पिंकभिलाका अनुसार शाहिदलाई उक्त समारोहमा 'बेस्ट एक्टर पपुलर' को अवार्ड दिने भनिएको थियो। योबाहेक उनी उक्त कार्यक्रममा नृत्य पनि प्रस्तुत गर्ने भएका थिए।
तर अन्तिम समयमा आएर समारोह आयोजकले शाहिदलाई अवार्ड दिएनन्।यसकारण शाहिद रिसाएर कार्यक्रम छाडेर हिँडेका थिए।
शाहिद कपुर आजभोलि नयाँ फिल्म 'जर्सी' को सुटिङमा व्यस्त छन्। यो तेलेगु सुपरहिट फिल्मको रिमेक हो।
