कमेडियनबाट अभिनेता बनेका कपिल शर्मा नयाँ फिल्ममा देखिने भएका छन्।
भारतीय सञ्जार माध्यम दैनिक जागरणका अनुसार उनी फिल्म 'द क्रू' मा देखिन लागेका हुन्।
यस फिल्ममा उनी बलिउडका चर्चित अभिनेत्रीसँग काम गर्दैछन्। उनीसँग फिल्ममा करीना कपूर खान, कृति सेनन र तब्बू देखिनेछन्। तर कपिलले फिल्मबारे आधिकारिक जानकारी दिएका छैनन्।
राजेश कृष्णननले निर्देशन गरिरहेको फिल्ममा एकता कपूर र रिया कपूरको लगानी छ। कमेडी जनराको फिल्ममा पञ्जाबी गायक तथा अभिनेता दिलजीत दोसाँझको पनि मुख्य भूमिका रहनेछ।
एकता कपूरले इन्स्टाग्राममार्फत फिल्मको छायांकन सुरू भएको जानकारी दिएकी छन्।
कपिलले आफ्नो फिल्मी करियर अब्बास मस्तान निर्देशित फिल्म ‘किस किसे प्यार करूं’ बाट सुरू गरेका थिए। उनले ‘फिरंगी’ र ‘ज्विगाटो’ फिल्ममा समेत अभिनय गरेका छन्। यी तीनै फिल्मले बक्स अफिसमा राम्रो व्यापार गर्न सकेनन्।
हाल कपिलको ‘द कपिल शर्मा शो’ को चौथो सिजन प्रसारण भइरहेको छ।
कपिललाई सानै उमेरदेखि गायनमा रूचि थियो। तर उनले थिएटरमा काम गरे। थिएटरमा काम गर्दा उनले निकै चर्चा कमाए। यसैकारण उनलाई अमृतसरको कलेजले निःशुल्क भर्ना गरेको थियो।
स्तातक सकिएपछि उनी मुम्बईमा आए। उनले ‘ग्रेट इन्डियन लाफ्टर च्यालेन्ज’ मा अडिसन दिए तर छनोट भएनन्। यसै शोको तेस्रो सिजनमा उनले पुनः अडिसन दिए। यस सिजनमा उनी छनोट मात्र भएनन्, विजेता नै भए। यस शोको विजेता भएपछि उनले पछि फर्किएर हेर्नु परेन।
उनले ‘छोटे मियाँ, झलक दिखा जा र कमेडी सर्कस’ जस्ता कमेडी शोमा काम गरेका छन्। त्यसपछि उनले आफ्नै प्रोडक्सन हाउसबाट ‘कमेडी नाइट्स विथ कपिल’ सञ्चालनमा ल्याएका थिए।
