अमेरिकी सिरिज 'गेम अफ थ्रोन्स'की मुख्य कलाकार 'सान्सा' अर्थात् सोफी टर्नरले बिहे गरेकी छन्। बुधबार लास भेगसमा सोफीले आफ्ना प्रेमी जो जोनाससँग बिहे गरेकी हुन्। जो संगीतकार हुन् र गायक निक जोनासका भाइ हुन्।
२३ वर्षीया सोफी र २९ वर्षीया जोको सन् २०१७ मै इंगेजमेन्ट भएको थियो। बिहेको मिति उनीहरूले सार्वजनिक गरेका थिएनन्।
भेगासमा 'बिलबोर्ड म्युजिक अवार्डस्' मा सहभागी हुन गएको यो जोडीले अचानक बिहे गरेको खुलासा भएको बिबिसीले जनाएको छ।
अमेरिकी डिजे डिप्लोले सोफी र जोको बिहेका फोटा र भिडिओ इन्स्टाग्राममा राखेपछि यो खबर बाहिरिएको हो।
सोफी टर्नर र जो जोनाससोफी अभिनित गेम अफ थ्रोन्सको अन्तिम सिजन चलिरहँदा उनको लोकप्रियता झनै चुलिएको छ। सिरिज क्रममै सोफी र 'आर्या' अर्थात् मेजी विलियम्स मिल्ने साथी भएका थिए। सोफीले आफ्नो बिहेमा मेजी नै 'मेड अफ अनर' हुने बताएकी थिइन्। तर सुटक्क गरेको बिहेमा यो सम्भव भएको देखिँदैन।
बिबिसीका अनुसार मेजी भेगासमा थिइन् कि थिइनन् भन्ने पनि यकिन छैन।
त्यसैले उनीहरूले सानो स्टेजमा खुसुक्क बिहे गरे पनि आफन्त र साथीभाइका निम्ति अरू कार्यक्रम गर्ने अनुमान गरिएको छ।
सोफी र जो पछिल्लो समय निक र बलिउड अभिनेत्री प्रियंका चोपडाको बिहेमा भारत आएका थिए।
सोफी र जोको बिहेको झलक
जो जोनास र सोफी टर्नर (माथिल्लो लहर)। निक जोनास र प्रियंका चोपडा (तल्लो लहर)
