विश्व प्रसिद्ध गायन प्रतिभाको खोज रियालिटी शो अमेरिकन आइडलको उपाधि दौडमा रहेका नेपाली मूलका दिवेश पोखरेल उत्कृष्ट सातमा पुगेका छन्।
आइडलको १८ औँ संस्करणको उपाधि यात्रामा अघि बढ्ने क्रममा दिवेश उत्कृष्ट सातभित्र पर्न सफल भएका हुन्।
उत्कृष्ट ११ प्रतिस्पर्धीबीचमा मतका आधारमा आइतबार सर्वाधिक मत ल्याउने उत्कृष्ट सातको छनोट गरिएको हो।
अमेरिकाको कन्सास राज्यको विचिटा शहरमा बस्दै आएका २२ वर्षीय दिवेशले अमेरिकन आइडलमा आर्थर गनको नामले प्रतिस्पर्धा गरिरहेका छन्।
दिवेशले उत्कृष्ट सातमा पर्ने क्रममा गाएको 'किस द गर्ल' बोलको गीत एनिमेटेड फिल्म 'द लिटल मर्मेड'को हो। एलान मेनकनका शब्द, होवार्ड एस म्यानको संगीत र स्यामुअल ई. राइटको स्वरमा यो गीत सर्वप्रथम सन् १९८९ मा रिलिज भएको थियो। पछि फिल्म 'रिमेक' हुँदै आउँदा यसलाई विभिन्न गायकले गाए।
दिवेशको अमेरिकन आइडलमा सहभागितासँगै नेपाली समुदायमा पनि आइडलप्रति चासो बढेको छ।
अमेरिकाको एबिसी टेलिभिजनबाट अमेरिकन आइडल कार्यक्रम प्रसारण हुँदै आएको छ।
(राससका लागि सुरज भण्डारी)
