अमेरिकी गायिका एरियना ग्रान्डले आफ्नो इन्गेजमेन्ट घोषणा गरेकी छिन्। पिंकभिल्लाका अनुसार, एरियना ग्रान्डले आफ्नो इन्स्टाग्राम मार्फत प्रेमी डाल्टन गोमेजसँग इन्गेजमेन्ट सार्वजनिक गरेकी हुन्।
आइतबार यी गायिकाले इन्स्टाग्राममा प्रेमी डाल्टनसँग खिचेका फोटाहरू पोस्ट गरेकी थिइन्। एउटा फोटोमा एरियानाको औंलामा ठूलो औंठी देखिएको छ। यही आधारमा फ्यानहरुले उनको इन्गेजमेन्टबारे जानकारी पाएका हुन्।
एरियनाको प्रेमी डाल्टन गोमेज रियल स्टेट एजेन्ट हुन्। यो जोडी करिब ९ महिनादेखि सँगै भएको पिंकभिल्लाले बताएको छ।
महामारीका बेलामा पनि उनीहरु क्वारेन्टाइनमा सँगै बसेका थिए। जसले गर्दा एरियनाले डाल्टनलाई झनै नजिकबाट चिन्न पाइन्।
यसअघि २०१८ मा एरियना कमेडियन पिटर डेभिडसनसँग सम्बन्धमा थिइन्। तर, उनीहरू एक वर्षमा नै छुटिएका थिए।
एरियनाले आफ्नो संगीत करिअरमा थुप्रै अवार्ड जितिसकेकी छिन्। हालसम्म उनले एउटा ग्रामी अवार्ड, दुई बिलबोर्ड म्यूजिक अवार्ड, तीन अमेरिकन म्यूजिक अवार्ड र नौ एमटिभी म्युजिक भिडियो अवार्ड पाएकी छिन्।
उनको नाममा आठ वटा 'गिनिज वर्ल्ड रेकर्ड' पनि छ।
