हलिउड अभिनेता ड्यानियल क्रेगले जेम्स बोन्डको रुपमा आफ्नो अन्तिम छायांकन सक्काएका छन्।
उनले जेम्स बोन्डको सातौं श्रृखंला ‘नो टाइम टु डाइ’ फिल्मबाट आफ्नो भूमिका पूरा गरेका हुन्।
काल्पनिक बेलायती जासुसी एजेन्टमा आधारित जेम्स बोन्डको भूमिकामा थुप्रै हलिउड अभिनेताले अभिनय गरेका छन्, तर तीमध्ये बढी चर्चा कमाएका अभिनेता हुन् ड्यानियल क्रेग। अब भने उनले यो पात्रबाट बिदा लिएका छन्।
भेरायिटीका अनुसार एप्पल टिभीले जेम्स बोन्डको रुपमा ड्यानियलको ‘क्यासिनो रोयल’, ‘क्वान्टम अफ सोलेस’, ‘स्काइफल’, ‘स्पेक्टर’ र ‘नो टाइम टु डाइ’ फिल्मसम्मको यात्रा वृत्तचित्र देखाएको थियो।
वृत्तचित्रमा उनको अन्तिम अभिनय पनि देखाइएको थियो, जसमा ड्यानियल एक गल्लीमा दौडिँदै फ्रेमबाट बाहिरिन्छन्। योसँगै उनको पन्ध्र वर्षको लामो करियर समाप्त भएको छ।
हिन्दुस्तान टाइम्सका अनुसार फिल्मको छायांकन सकिएपछि ड्यानियलले छोटो भाषण दिएका थिए। उनको कुरा सुनेर फिल्म सेटका कर्मचारीहरु भावुक भए र आँसु झार्दै एकअर्कालाई अंकमाल गरे।
उनीहरुसँगै ड्यानियलपनि भावुक भएका थिए।
‘मैले अभिनय गरेको पाँचवटा फिल्म मसँगै धेरै साथीहरुले काम गरे र ती फिल्मका हरेक क्षण मेरो लागि निकै प्यारो छ,’ आफ्नो आँसु थाम्दै ड्यानियलले भने, ‘यी साथीहरुसँग काम गर्न पाउँदा मैले निकै खुसी पाए र यो मेरो जीवनको सबैभन्दा ठूलो सम्मान भएको छ।’
‘नो टाइम टु डाइ’ फिल्मको प्रिमियर सेप्टेम्बर २८ मा लन्डनको रोयल अल्बर्ट हलमा हुनेछ। यो फिल्म सेप्टेम्बर ३० देखि बेलायत र आयरल्यान्डमा रिलिज हुनेछ। अमेरिकामा अक्टोबर ८ देखि रिलिज हुने हिन्दुस्तान टाइम्सले जनाएको छ।
