हलिउड फिल्म 'द ब्याटम्यान' को नयाँ ट्रेलर सार्वजनिक भएको छ।
आइतबार वार्नर ब्रोज पिक्चर्सको आधिकारिक युट्युब च्यानलमार्फत् ट्रेलर सार्वजनिक भएको हो।
ब्याटम्यान श्रृंखलाको यो नयाँ फिल्ममा ब्रुस वेनका रूपमा रोबर्ट प्याटिन्सनले भूमिका निर्वाह गरेका छन्।
रोबर्ट 'द ट्वाइलाइट सागा' फिल्म श्रृंखलाबाट चर्चा कमाउन सफल अभिनेता हुन्।
यसअघिका ब्याटम्यान श्रृंखलामा भने बेन एफलेकले मुख्य भूमिका निर्वाह गर्दै आएका थिए। यो नयाँ भाग पनि उनले नै लेख्ने, निर्देशन गर्ने र खेल्ने कुरा थियो।
अन्तर्राष्ट्रिय सञ्चारमाध्यमहरूका अनुसार पछि बेन आफैं आफ्नो स्क्रिप्टमा असन्तुष्ट देखिए। यसपछि यो फिल्मको जिम्मा निर्देशक म्याट रिभ्सकहाँ पुग्यो।
रिभ्सले बेनको स्क्रिप्टलाई पिटर क्रेगसँग मिलेर पुनर्लेखन गरे र जवान ब्याटम्यानको भूमिकालाई मुख्य बनाउनेमा केन्द्रित भएका बताइएको छ।
यसमा रोबर्टसँगै जोइ क्राभिट्ज, पल डानो, जेफ्री राइट, जोन टुर्टुरो, पिटर सर्सगार्ड, एन्डी सर्किस र कोलिन फ्यारेल पनि मुख्य भूमिकामा छन्।
फिल्ममा ब्याटम्यानको सामना रिडलर नामको सिरियल किलरसँग हुनेछ।
फिल्म आगामी मार्च ४ रिलिज हुने पनि वार्नरले जानकारी दिएको छ।
