हलिउड अभिनेता जोनी डेपले आफ्नी पूर्वपत्नी एम्बर हर्डविरूद्ध मानहानीको मुद्दा जितेका छन्।
६ साता लामो सुनुवाइका क्रममा ती दुई हलिवुड स्टारले एक अर्कामाथि शारीरिक तथा भावनात्मक दुर्व्यवहारका नराम्रा खाले आरोपहरू लगाएका थिए।
अदालतले जोनी डेपलाई मानहानीको लागि १ करोड ५० लाख अमरिकी डलर क्षतिपूर्ति तिर्न आदेश दिएको छ। यसमा १ करोड डलर क्षतिपूर्तिको रूपमा दिइनेछ भने ५० लाख डलर जरिवाना तिर्नुपर्नेछ।
५८ वर्षे डेपविरुद्ध उनकी ३६ वर्षीया पूर्वपत्नी हर्डले विभिन्न तीन वटा मुद्दा लगाएकी थिइन्। त्यसमध्ये दुई वटामा अदालतले डेपलाई सफाइ दिएको छ।
तेस्रो मुद्दामा भने उनले आफ्ना वकिलका माध्यमबाट पूर्वपत्नीको मानहानी गरेको ठहर गर्दै हर्डलाई २० लाख डलर क्षतिपूर्ति दिनुपर्ने आदेश दिएको छ।
हर्डले अदालतको निर्णयलाई निराशाजनक भनेकी छन्। उनले यो निर्णयले आफ्नो मन टुटेको बताइन्।
‘म आफ्नो निराशा शब्दमा व्यक्त गर्न सक्दिनँ। मेरो मुटु टुटेको छ। प्रमाणको पहाडले पनि पूर्व पतिको शक्ति, प्रतिष्ठा र प्रभावलाई टिकाउन सकेन। म पनि निराश छु। यो निर्णयले अन्य महिलालाईसमेत असर गर्नेछ’, उनले भनिन्।
जोनी डेपले अदालतको आदेशलाई स्वागत गर्दै अदालतले आफ्नो जीवन फिर्ता दिएको बताए।
‘सुरूदेखि नै मुद्दाको उद्देश्य सत्य बाहिर ल्याउनु थियो, नतिजा जस्तोसुकै होस्। सत्यलाई कहिल्यै मेटाउन सकिँदैन’, अभिनेता जोनी डेपले भने।