कोलम्बियाकी पप स्टार शाकिरा र उनका प्रेमी तथा स्पेनका फुटबलर जेरार्ड पिकेले सम्बन्ध विच्छेद गर्ने घोषणा गरेका छन्।
सीएनएनका अनुसार उनीहरू सम्बन्धमा रहेकाे ११ वर्षपछि छुट्टिन लागेका हुन्।
‘हामी अलग हुँदैछौंँ भन्दै गर्दा एकदमै दु:ख लागिरहेको छ। हाम्रा बच्चाहरूको भविष्य हाम्रो प्राथमिकतामा रहनेछ। हामी दुवै एकअर्काको गोपनियतालाई सम्मान गर्नेछौं,’ उनीहरूले शनिबार जारी एक संयुक्त विज्ञप्तिमा बताएका छन्।
यी दुईको भेट १२ वर्षअघि भएको थियो। सन् २०१० को विश्वकपमा शाकिराले 'वाका वाका' गीतको भिडिओ छायांकन गर्ने क्रममा उनीहरू नजिकिएका थिए। उनीहरूको दुई सन्तान मिलान र साशा छन्।
जेरार्ड पिके हाल बार्सिलोनाको केल मुन्टानेरमा एक्लै बस्दै आएका छन्।