हलिउड फिल्म 'जोकर २' मा गायिका तथा अभिनेत्री लेडी गागा देखिने भएकी छन्।
द हलिउड रिपोटरका अनुसार हार्ले क्वीनको भूमिकाका लागि लेडी गागासँग निर्माण टिमले कुराकानी गरिरहेको छ। यो फिल्म म्युजिकल ड्रामामा आधारित हुने बताइएको छ।
लेडी गागाले फिल्म साइन गरिन् भने यो उनको पहिलो सुपरहिरोको भूमिका हुनेछ। फिल्ममा अभिनेता जोकिन फिनिक्स मुख्य भूमिकामा देखिनेछन्।
केही दिनअगाडि निर्देशक टड फिलिप्सले इन्स्टाग्राममार्फत 'जोकर २' बन्ने जानकारी दिएका थिए। यस सिक्वेलको नाम 'जोकर: फोली अ डू' राखिएको छ। फिल्मको कथा स्कट सिल्भर र फिलिप्सले तयार पारेका छन्।
सन् २०१९ मा प्रदर्शन भएको फिल्म 'जोकर'ले विश्वभरिबाट एक बिलियन डलर कमाइ गरेको थियो। २०२० मा यसै फिल्मबाट फिनिक्सले उत्कृष्ट अभिनेताका ओस्कर अवार्ड समेत हात पारेका थिए।
